domingo, 20 de septiembre de 2026
O secretario xeral de Política Lingüística, Anxo Lorenzo, animou os máis novos a seguir lendo en lingua galega durante a entrega dos premios Frei Martín Sarmiento, que tivo lugar no recinto feiral de Silleda no marco da Festa da Lingua.
Estes galardóns, que resolven os alumnos e alumnas votando os seus libros preferidos, recaeron este ano en Manuel Uhía, vencedor na primeira categoría de primaria pola obra O autobús da selva, e mais en María Reimóndez, que se fixo co premio na segunda categoría co traballo Lía e as zapatillas de deporte.
A Festa da Lingua, unha iniciativa que impulsa a Federación de Relixiosos do Ensino en Galicia (Ferega-Ceca), reuniu na presente edición preto de 1.000 alumnos e alumnas de primaria de diversos centros de ensino pertencentes a esta federación.
Ademais da entrega de premios, durante a mañá tamén tiveron lugar faladoiros dos rapaces e rapazas cos autores e xa pola tarde realizáronse diversas actividades lúdicas, como contacontos, a posta en escena de obras de teatro e un concerto, entre outras.
A Festa da Lingua continuará o próximo día 23 de abril, cando terá lugar a entrega dos Premios Frei Martín Sarmiento na terceira e cuarta categorías de educación secundaria e mais dos premios de curtametraxes Rec-curta.
A colaboración de Ferega e Política Lingüística para promover o uso do galego
Durante o pasado ano, Ferega desenvolveu un amplo programa de actuacións destinadas a impulsar o uso do galego na súa actividade no marco do convenio de colaboración coa Secretaría Xeral de Política Lingüística. Neste sentido, distribuíronse modelos de documentación e manuais de galego para o persoal de administración dos centros e difundiron material para as principais festas do ano litúrxico, o servizo Remol e Remuíño, libros de oracións infantís e folletos coas respostas da misa en galego.
En canto ás actuacións dirixidas á docencia, celebraron cinco cursos de reciclaxe en lingua e técnicas para a narración oral, ademais doutras xornadas e actuacións informativas destinadas a favorecer a normalización deste colectivo. Para o alumnado, tamén organizaron en 2009 unha nova edición da Festa da Lingua, ademais dos Encontros de Regueifas e Hip Hop en galego, entre outras actividades.
Medio milleiro de investigadoras e investigadores e máis de 150 actividades científicas nas sete cidades galegas: Vigo, Ourense, Pontevedra, Santiago, A Coruña, Ferrol e Lugo. Así se celebrará en Galicia a sexta edición da Noite Galega das Persoas Investigadoras, G-Night 2026, unha actividade na que a comunidade científica galega une talento e esforzos co obxectivo de achegar a ciencia á cidadanía e espertar vocacións científicas, ao tempo que se ofrecen propostas de lecer científico, cultural e educativo para toda a familia.
A Xunta de Galicia reclama ao Goberno central medidas estruturais de apoio ao sector agrogandeiro. Do mesmo xeito, esíxese que se teña en conta a realidade de cada territorio á hora de levar a cabo estas actuacións, que deben executarse de xeito urxente. Así o trasladou a conselleira do Medio Rural, María José Gómez, na Conferencia Sectorial celebrada en Madrid, na que se dirixiu ao ministro de Agricultura, Pesca e Alimentación, Luis Planas, para facer estas reclamacións. Alí, reafirmou tamén o compromiso do Executivo galego con este sector.
