Notas de prensa

A USC ampliará en 37.000 metros cadrados o campus de Lugo co proxecto Campus 2015

O proxecto Campus 2015 promovido pola Universidade de Santiago de Compostela (USC) en Lugo suporá a ampliación das dotacións universitarias en 37.000 metros cadrados en 5 anos, e cun investimento de 20 millóns de euros. Campus de Lugo 2015 pretende consolidar a oferta docente existente e incrementar a investigación e o emprendemento.

O reitor da USC, Senén Barro, presentou o proxecto de desenvolvemento do Campus de Lugo co horizonte posto no ano 2015. Nun acto celebrado na Vicerreitoría luguesa, estivo acompañado do presidente da Deputación Provincial, José Ramón Gómez Besteiro, e do alcalde da cidade, Xosé Clemente López Orozco. Tamén asistiron os vicerreitores de Coordinación do Campus, Carlos Herrero, e de Economía, Financiamento e Infraestruturas, Miguel Vázquez Taín.

Campus de Lugo 2015, denominación do plan presentado, pretende consolidar a oferta docente existente e desenvolver a nova de forma axeitada, así como incrementar o potencial investigador e de emprendemento xa demostrado ata o de agora. “Atópamonos –lembrou o reitor- no máis desenvolvido dos campus non centrais do Sistema Universitario Galego, cunha oferta docente da que se benefician máis de 6.000 estudantes e cunha capacidade investigadora, uns servizos e unha infraestruturas moi importantes, sensiblemente reforzadas nos últimos anos”.

O desenvolvemento do plan implicará, entre outras actuacións, a construción de novos edificios de servizos e para centros singulares de investigación, a Escola de Enxeñaría Civil ou un pavillón polideportivo. Ademais suporá unha modificación substancial do urbanismo na principal arteria de entrada á cidade, o que permitirá amosar “un Lugo milenario e, ao tempo, moderno e atractivo para estudar, investigar ou investir”, subliñou Barro.

NotaDáse continuidade así ás intervencións desenvolvidas no Campus lugués entre 2002 e 2010, valoradas en máis de 21 millóns de euros e en máis de dez para equipamento científicos. Entre elas a sede do IBADER, o edificio CACTUS, as novas instalacións da Facultade de Ciencias, a Estación de Bioloxía do Courel ou o Museo e Casa do Coñecemento, anexo á Vicerreitoría.

“Ben organizado e harmónico”, subliñou o reitor ao referirse á distribución do campus lugués, en 2015 contará coa incorporación dunha serie de novas parcelas a través dun proceso de expropiación de máis de 25.000 metros cadrados que será realizado e financiado pola Deputación de Lugo. Segundo indicou Senén Barro, neste senso xa se atopa en fase de redacción o proxecto de execución da futura Escola de Enxeñaría Civil. O resto de actuacións están vinculadas á incorporación do solo a expropiar. Serán un conxunto de intervencións que completarán o abano de servizos do Campus, establecendo instalacións deportivas propias e, sobre todo, reforzando os espazos e medios para a investigación, a transferencia e o emprendemento.

Ademais, o proxecto suporá a integración no perímetro do Campus dunha finca de prácticas de 13.000 metros cadrados, recentemente cedida polo Concello e que se irá incorporando na medida en que se vaia dispoñendo do solo previsto para a ampliación do Campus no PXOM e que suporá un incremento adicional de máis de 30.000 metros cadrados na superficie total do Campus.

É un conxunto de iniciativas que conforman un “ambicioso proxecto” xa en execución que permitirán a Lugo “seguir desenvolvéndose dun modo importante nos próximos anos” e que “acentuará o seu papel como un dos principais campus do Estado no seu ámbito de especialización”, concretou Senén Barro. Este desenvolvemento concretarase “sobre todo na investigación, a transferencia e o emprendemento”, engadiu, “aproveitando o impacto da actividade investigadora do medio centenar de grupos de investigación e as importantes infraestruturas de investigación xa dispoñibles”.

Cooperación

En Campus de Lugo 2015 conflúe a implicación da USC, Deputación e Concello de Lugo, colaboración institucional que redundarán no beneficio do Campus tanto no relativo á docencia como á investigación, e que representa “unha aposta polo desenvolvemento socioeconómico da cidade, da provincia e do conxunto do país, sobre todo no sector primario, tan necesitado da inxección de coñecemento e desenvolvemento tecnolóxico”.

Gabinete de Comunicación da Universidade de Santiago de Compostela (USC), 2010-02-05

Actualidad

Foto del resto de noticias (setecidades-setesabores.jpg) Os chefs representantes de cada cidade son: Adrián Pérez de Sinxelo (Ferrol); Carlos Montes de La Sifonería Gastrobar (A Coruña); Rodrigo Seoane de ArteSana Gastrobar (Santiago de Compostela); Rubén González de El Cafetín de La Alameda (Pontevedra); Rebeca Guede de La Orensana (Vigo); Beatriz Alcalá de La zapatería del abuelo (Ourense) e Jose Luis Pardo de El Boni (Lugo). Os sete cociñeiros competirán por dous galardóns e serán outorgados por un xurado profesional e outro popular, integrado polos invitados á gala, que utilizará un sistema de televotación. Todos eles valorarán cada tapa segundo a súa complexidade técnica, creatividade, presentación e sabor.
Foto de la tercera plana (trens-turisticos-2026.jpg) Presetouse a segunda parte da campaña de Trens Turísticos de Galicia, que inician estee sábado 6 de xuño unha nova quenda de viaxes coas saídas da Ruta dos Faros e a da Ribeira Sacra polo Sil. Os trens que inician saída neste mes son o das Rutas dos Faros (con saídas 6 e 20 de xuño, 4 e 18 de xullo, 29 de agosto e 26 de setembro, todas vendidas); os da Ribeira Sacra polo Sil (6 e 27 de xuño e 11 de xullo, xa vendidas; e 1 e 22 de agosto e 12 de setembro, aínda con prazas á venda); a da Ribeira Sacra polo Miño (13 de xuño, esgotadas, e 5 e 26 de setembro); e a dos Mosteiros (20 de xuño -xa vendidas- e 25 de xullo). O programa de Trens Turísticos de Galicia é unha iniciativa de Turismo de Galicia, en colaboración con Renfe e o INORDE. En total, en 2026 realizaranse 13 rutas e 33 saídas, cunha ruta -a da Camelia- xa realizada.

Notas

A USC será do 10 ao 12 de xuño o punto de encontro da comunidade universitaria dedicada á Tecnoloxía Educativa co desenvolvemento das XXXIII Xornadas Universitarias de Tecnoloxía Educativa (JUTE 2026). O congreso, que reúne profesorado, persoal investigador e estudantado de universidades de toda España e do estranxeiro, regresa á Facultade de Ciencias da Educación baixo o lema ‘Alfabetización Dixital Crítica para unha Convivencia Híbrida’.
O Centro de Investigación Mariña da UVigo celebrou a súa primeira década de existencia, na que se consolidou como un dos polos científicos máis dinámicos do sistema galego integrado na Rede Cigus e como un referente no arco atlántico europeo. Foi nun acto institucional que tamén serviu para conmemorar os 20 anos da Estación de Ciencias Mariñas de Toralla, unha infraestrutura singular que forma parte da rede europea EMBRC e que dá soporte a unha comunidade científica de máis de 200 investigadores dedicados ao estudo do océano.
PUBLICIDAD
ACTUALIDAD GALICIADIGITAL
Blog de GaliciaDigital
HOMENAXES EGERIA
PUBLICACIONES