Notas de prensa

Comisión sectorial do Consello Consultivo para Asuntos Comunitarios celebrada en Madrid

Entre os temas da orde do día que se trataron atópanse o regulamento do acordo pesqueiro con Mauritania, así como a proposta da Comisión Europea para axudar ao sector pesqueiro a paliar a situación derivada da suba do custo do combustible.

Con respecto ao primeiro dos asuntos, a titular de Pesca da Xunta de Galicia explicou que o regulamento da Unión Europea, que nestes momentos está enriba da mesa, satisfai as expectativas de Galicia e de España, agás no que ten que ver coa redución do número de licenzas na categoría de pesca de cefalópodos. Neste sentido, Carmen Gallego destacou que tanto a Consellería de Pesca como o Goberno de España non están de acordo coa redución das posibilidades de pesca de cinco licenzas, é dicir, de 29 a 24, xa que racha co principio de estabilidade relativa. Ademais, engadiu que a postura española xa se plantexou no Consello de Ministros anterior e sobre ela vaise seguir traballando ao longo desta semana para intentar modificar ese criterio. De todas formas, sinalou que de aprobarse o acordo pesqueiro con Mauritania nos termos actuais na vindeira reunión dos ministros de Pesca, España non votará a favor.

En canto á proposta do regulamento para axudar ao sector pesqueiro pola suba do prezo do carburante, a responsable de Pesca destacou que se trata dunha iniciativa cun carácter moi técnico. En termos xerais, céntrase na modificación de determinados aspectos do Fondo Europeo da Pesca, coa instauración de medidas de apoio á frota vencelladas, sobre todo, coas paradas temporais para os buques sometidos a plans de reestruturación, de xestión e de recuperación, e outro tipo de plans. En relación a isto, Carmen Gallego amosou o seu desacordo co requisito de que as paradas temporais estean nun marco de paralización definitiva do 30 por cento, unha cifra que considerou excesiva.

Así mesmo, a Conselleira fixo fincapé en que, dado o carácter sumamente técnico da proposta, os grupos de Pesca van seguir traballando sobre ela os vindeiros días en Bruxelas co fin de que se poidan ir contestando, por parte da Comisión Europea, as preguntas que xorden sobre a forma de aplicación de determinadas medidas que establece. Neste sentido, a Administración Xeral do Estado e as Comunidades Autónomas traballarán conxuntamente para tentar aclarar os pormenores deste regulamento.

De todos os xeitos, Carmen Gallego concretou que, en base a esta proposta, a Unión Europea vai establecer unha dotación orzamentaria de 600 millóns de euros, con cargo a un fondo distinto ao FEP, para repartir entre todos os estados membros en función dos criterios que se acorden cos países da UE.