domingo, 12 de mayo de 2024
O xurado encargado de fallar os galardóns do II Certame de Paisaxe Sonora, ao que concorreron un total de 16 propostas, acordou asemade destacar como pezas finalistas as composición Raposo, de Anne Lepere, As Pontes da Ulloa, de Jesús Otero Seoane, e Navegando, de Eloísa Matheu Cortada.
Alén dos galardóns outorgados polo xurado do II Certame de Paisaxe Sonora, un tribunal formado por Xoán Xil López Rodríguez, Arturo Vaquero Taboada e Marco Antonio Maril Pardo, o Grupo de Creación Sonora da USC (GCSUS) agasallou co Premio honorífico Inmaculada Cárdenas GCSUS 2023 a El Peregrino.
Asemade os responsables do GCSUS, Efraín Díaz, Inmaculada Cárdenas e Mónica Álvarez, acordaron conceder cadansúa mención de honra a outras tres pezas. Daquela, o GCSUS outorgou este recoñecemento ás obras Raposo e Sensacións do Morrazo, ao tempo que salientou a calidade das gravacións e a capacidade para xerar sensacións da peza Navegando.
Tivo lugar unha xornada de debate organizada pola Fundación Galicia Europa (FGE) no marco da celebración do Día de Europa co obxectivo de abordar coa mocidade universitaria o estado actual do proxecto de construción europea. No evento colaboraron a asociación xuvenil Equipo Europa e a asociación de debate universitario Retórica da Universidade de Vigo. No evento tratouse o impacto da Unión Europea e das eleccións ao Parlamento Europeo do próximo xuño. A fundación ten en marcha unha campaña en redes sociais para informar á cidadanía galega sobre o traballo das institucións da UE e sobre o seu impacto en Galicia. En liña co seu compromiso con achegar a Unión á xuventude, patente na iniciativa EuroXuventude, a campaña estará principalmente destinada á mocidade.
A Cidade da Cultura de Galicia reivindica na exposición 'Outras historias posibles' a obra de seis artistas contemporáneas vinculadas a Galicia que despuntaron nos anos 80 do pasado século. A mostra, que abrirá a súas portas no Museo Centro Gaiás da Cidade da Cultura a finais deste mes de maio, reúne unha ampla escolma dos traballos de Ana García Pan, Emilia Guimeráns, Anne Heyvaert, Tusi Sandoval, Blanca Silva e Laura Terré co obxectivo de celebrar o seu talento e contextualizar a súa obra, atendendo tanto ás influencias do contexto histórico como aos eventos da vida privada que determinaron o seu devir artístico.
