domingo, 12 de mayo de 2024
A cita, que se celebra no salón de actos do edificio de Ciencias Experimentais, desenvolverase ao longo do día de hoxe e na mañá deste venres. O encontro conta con oradores invitados internacionais e nacionais procedentes de disciplinas como os nanomateriais, a oncoloxía, a bioinformática, a bioestatística, a inmunoloxía, a síntese química e outras disciplinas abordadas polo CINBIO. O obxectivo é abrir, ao longo das dúas xornadas, un debate creativo sobre novas ferramentas para a medicina do futuro conxugando as achegas procedentes e todas estas áreas.
Unha xuntanza de alcance internacional
No acto de apertura do simposio, a vicerreitora de Internacionalización, Maribel del Pozo, puxo en valor que este evento se teña convertido nun símbolo de innovación, colaboración e progreso no campo da biotecnoloxía e ciencias da vida e lembrou que CINBIO é un dos tres centros de investigación de referencia da Universidade de Vigo e estamos moi orgullos de poder dicir que se ten convertido nun plataforma líder que reúne a mentes brillantes de diferentes orixes e disciplinas, constituíndo unha rede global de científicos unido por un propósito común que é avanzar nas fronteiras do coñecemento para beneficio da humanidade a través da biomedicina e biotecnoloxía.
Por parte do CINBIO no acto de apertura interveu Isabel Pastoriza, membro do equipo directivo do centro, que salientou que o obxectivo principal do evento é reunir a científicos académicos, estudantes e investigadores da industria para fomentar, promover e recoñecer a investigación científica sobresaínte. Lembrou que dende o seu inicio en 2017, este encontro anual foi sempre integramente organizado polos investigadores de posdoutoramento do CINBIO e tense consolidado como unha plataforma para debates interdisciplinarios, facilitando o intercambio de experiencias e achados de investigación sobre diversos temas de investigación científica e social e tamén como foro de discusión de desafíos prácticos atopados e as solucións correspondentes.
Segundo Pastoriza, o feito de contar con participantes de nove países diferentes fai que a xuntanza teña realmente un alcance internacional e ademais o programa integral brinda amplas oportunidades para establecer contactos e interacción entre os asistentes. A investigadora tamén trasladou o agradecemento do CINBIO ao persoal investigador que se encargou da organización do evento, así como aos membros do comité científico, aos poñentes e aos presentadores de pósters. Co voso apoio e participación, o noso obxectivo é garantir o éxito futuro deste encontro.
Finalmente, en representación do Concello de Vigo asistiu Jaime Aneiros, concelleiro de Orzamentos e Facenda, que subliñou a importancia da investigación científica na Universidade e na cidade de Vigo e destacou que cinco dos seis centros tecnolóxicos que ten Galicia están nesta cidade.
194 participantes, 20 presentacións orais e 85 de pósters
Aínda que a previsión inicial do comité organizador era contar con 150 participantes, a cifra final foi bastante superior, con 194 persoas inscritas procedentes de nove países diferentes. En total terán lugar 20 presentacións orais e 85 presentacións de pósters, que forman o núcleo deste encontro, ademais da participación de 12 conferenciantes convidados: Luis Liz Marzán, catedrático de Química Física da UVigo e investigador do Cinbio e do CIC biomaGUNE; Sara Abalde-Cela, investigadora do International Iberian Nanotechnology Laboratory de Braga; Roberto de la Torre Martínez, investigador do Karolinska Institutet de Estocolmo; José Alemán, profesor titular na Universidad Autónoma de Madrid; Sovan Sarkar, profesor titular na University of Birmingham; Manel Juan, xefe da plataforma de inmunoterapia do Hospital Clínic de Barcelona; Patricia Horcajada, directora da Unidade de Materiais Porosos Avanzados da Fundación IMDEA Energía; María Mayán, investigadora do Instituto de Investigación Biomédica de A Coruña; Cristina Vieira, investigadora do Instituto de Investigação e Inovação em Saúde da Universidade do Porto; Luz Calle, profesora titular da Universitat Politècnica de Catalunya; Katherine Villa, investigadora do Instituto de Investigación Química de Cataluña e Francisco Fernández Trillo, investigador distinguido do Centro Interdisciplinar de Química e Bioloxía e da Facultade de Ciencias da Universidade da Coruña.
Precisamente, o encargado de abrir o simposio foi o profesor Liz Marzán, cun relatorio sobre os mecanismos de crecemento e a resposta óptica das nanopartículas metálicas quirais.
Tivo lugar unha xornada de debate organizada pola Fundación Galicia Europa (FGE) no marco da celebración do Día de Europa co obxectivo de abordar coa mocidade universitaria o estado actual do proxecto de construción europea. No evento colaboraron a asociación xuvenil Equipo Europa e a asociación de debate universitario Retórica da Universidade de Vigo. No evento tratouse o impacto da Unión Europea e das eleccións ao Parlamento Europeo do próximo xuño. A fundación ten en marcha unha campaña en redes sociais para informar á cidadanía galega sobre o traballo das institucións da UE e sobre o seu impacto en Galicia. En liña co seu compromiso con achegar a Unión á xuventude, patente na iniciativa EuroXuventude, a campaña estará principalmente destinada á mocidade.
A Cidade da Cultura de Galicia reivindica na exposición 'Outras historias posibles' a obra de seis artistas contemporáneas vinculadas a Galicia que despuntaron nos anos 80 do pasado século. A mostra, que abrirá a súas portas no Museo Centro Gaiás da Cidade da Cultura a finais deste mes de maio, reúne unha ampla escolma dos traballos de Ana García Pan, Emilia Guimeráns, Anne Heyvaert, Tusi Sandoval, Blanca Silva e Laura Terré co obxectivo de celebrar o seu talento e contextualizar a súa obra, atendendo tanto ás influencias do contexto histórico como aos eventos da vida privada que determinaron o seu devir artístico.
