domingo, 12 de mayo de 2024
O IGFAE, centro mixto da USC e da Xunta de Galicia, convidou a Tatsuya Nakada a Compostela con motivo da defensa da tese do investigador predoutoral do IGFAE, Marcos Romero Lamas.
Tatsuya Nakada chegou nos anos 70 ao CERN para realizar a súa tese doutoral e participar na construción do primeiro colisionador protón-protón, o ISR, que preparou o camiño para construír aceleradores posteriores como o LHC. Dirixiu o experimento LHCb do CERN, un dos experimentos principais do LHC dende a súa primeira proposta en 1995 ata o final da súa construción en 2008, sendo considerado o "pai" desta gran colaboración internacional que hoxe está integrada por máis de 1.000 físicos e físicas. Xogou ademais un papel importante en promover a participación da USC no LHCb dende o inicio da proposta, cando comezou a colaborar co profesor Adeva. Na consecución do devandito experimento o IGFAE da USC tivo unha participación importante construíndo o Silicon Tracker, un detector de silicio para reconstruír as traxectorias das partículas.
Despois de dirixir o LHCb durante case 15 anos, presidiu o Comité Europeo de Aceleradores do Futuro, que establece os obxectivos e prioridades para desenvolver os aceleradores de partículas en Europa durante os próximos 50 anos. Na actualidade, dirixe o equipo internacional para o estudo do International Linear Collider (ILC), proposto polo goberno de Xapón, que é un dos aceleradores que se barallan para o futuro, xunto coa proposta do propio CERN.
O Modelo Estándar, a proba
A tese doutoral presentada este luns 27 e na que Nakada foi presidente do tribunal aborda unhas medidas de enorme precisión do ángulo de oscilación materia-antimateria do mesón pesado B, realizadas polo investigador predoutoral Marcos Romero Lamas baixo a dirección de Veronika Chobanova e Diego Martínez. Estas medidas constitúen un dos obxectivos principais do experimento LHCb no seu conxunto e son as máis precisas do mundo ata a data, poñendo a proba a validez do Modelo Estándar da física de partículas. Os resultados serán publicados en breve pola colaboración LHCb.
Tivo lugar unha xornada de debate organizada pola Fundación Galicia Europa (FGE) no marco da celebración do Día de Europa co obxectivo de abordar coa mocidade universitaria o estado actual do proxecto de construción europea. No evento colaboraron a asociación xuvenil Equipo Europa e a asociación de debate universitario Retórica da Universidade de Vigo. No evento tratouse o impacto da Unión Europea e das eleccións ao Parlamento Europeo do próximo xuño. A fundación ten en marcha unha campaña en redes sociais para informar á cidadanía galega sobre o traballo das institucións da UE e sobre o seu impacto en Galicia. En liña co seu compromiso con achegar a Unión á xuventude, patente na iniciativa EuroXuventude, a campaña estará principalmente destinada á mocidade.
A Cidade da Cultura de Galicia reivindica na exposición 'Outras historias posibles' a obra de seis artistas contemporáneas vinculadas a Galicia que despuntaron nos anos 80 do pasado século. A mostra, que abrirá a súas portas no Museo Centro Gaiás da Cidade da Cultura a finais deste mes de maio, reúne unha ampla escolma dos traballos de Ana García Pan, Emilia Guimeráns, Anne Heyvaert, Tusi Sandoval, Blanca Silva e Laura Terré co obxectivo de celebrar o seu talento e contextualizar a súa obra, atendendo tanto ás influencias do contexto histórico como aos eventos da vida privada que determinaron o seu devir artístico.
