viernes, 26 de abril de 2024
O conselleiro de Cultura, Educación e Ordenación Universitaria, Román Rodríguez González, e o director de Instituto Cervantes, Juan Manuel Bonet, anunciaron na Cidade da Cultura de Galicia que ambas institucións organizarán de xeito conxunto unha gran exposición para recuperar e pór en valor a obra de Baldomero Pestana (Castroverde, Lugo. 1917-2015), fotógrafo galego descoñecido para o gran público, pero un referente da imaxe segunda metade do século XX.
A exposición, titulada Pestana, a verdade entre as más, inaugurarase o 15 de febreiro na sede do Cervantes en Madrid e chegará o 27 de abril ao Museo Centro Gaiás da Cidade da Cultura (Santiago de Compostela), onde poderá visitarse ate o 2 de setembro. O proxecto está comisariado pola galega Chus Villar e polo escritor Juan Bonilla, e conta coa implicación dos familiares de Pestana, Antonio Polín Pérez e Carmen Rico Coira, responsables dos fondos.
Na mostra, a máis ambiciosa realizada até o momento sobre Pestana, exhibiranse 150 fotografías, imaxes de denuncia social e retratos de escritores e intelectuais, como Pablo Neruda, García Márquez, Vargas Llosa, Man Ray ou Dizzy Gillespie. O visitante poderá seguir o seu periplo vital nas tres cidades nas que se enmarca a vida de Pestana antes de regresar a Galicia: Bos Aires, Lima e París.
Rescatar do esquecemento
Román Rodríguez subliñou a transcendencia dun proxecto que rescatará dun inxusto esquecemento a un mestre da cámara descoñecido para o gran público e permitirá pór en valor a un galego que viviu conectado á escena cultural do seu tempo, deixando imaxes imprescindibles para achegarse á efervescencia artística do Perú dos anos cincuenta ou ao boom latinoamericano da década dos sesenta en París.
Juan Manuel Bonet comprometeu os esforzos do Instituto Cervantes para dar a coñecer dentro e fóra de España a obra de Pestana, situándoo no lugar que lle corresponde entre os grandes fotógrafos da segunda metade do século XX.
A presentación do proxecto contou coa presenza do secretario xeral de Cultura, Anxo Lorenzo Suárez, da directora da Fundación Cidade da Cultura, Ana Isabel Vázquez Reboredo, dos familiares de Pestana, Antonio Polín Pérez e Carmen Rico Coira, e dun dos comisarios da exposición, Chus Villar, quen chamou a atención non só sobre a calidade artística das fotografías, senón tamén sobre a extraordinaria biografía dun galego que percorreu o mundo cunha ollada sensible e intuitiva, de admiración, de humildade e de interese polo detalle, por riba da procura do espectáculo.
Precisamente para achegarse á vida e ao universo creativo de Pestana, con motivo da exposición exhibirase tamén o documental A imaxe reb/veleda, produción dirixida por Andrea Vázquez García, producida por Miramemira e que se gravou durante os últimos anos de vida do fotógrafo, despois do seu regreso a Galicia.
Homenaxe a Casares no Cervantes
Con esta exposición, a Xunta e o Instituto Cervantes continúan nun estratexia de colaboración para pór en valor figuras da cultura galega aproveitando a capacidade de proxección da Cidade da Cultura e a rede de centros do Instituto Cervantes no exterior. Precisamente a exposición José Suárez, uns ollos vivos que pensan, producida pola Fundación Cidade da Cultura de Galicia, ten viaxado da man do Cervantes a París, Toquio e, actualmente, atópase en Nova Delhi.
Nesta mesma liña de colaboración institucional, o director do Cervantes e o conselleiro de Cultura anunciaron hoxe que o vindeiro 19 de decembro se lle vai facer unha homenaxe Carlos Casares na sede madrileña do Instituto Cervantes.
A Formación Profesional galega contará a partir do vindeiro curso co dobre de inglés do marcado como mínimo na normativa básica estatal e permitirá ao alumnado realizar ata 700 horas de formación práctica, ata un 82% máis que ata o momento. Todo isto mantendo o peso da formación no centro educativo, cuxo profesorado é o piar fundamental do éxito acadado polo sistema galego de FP nos últimos anos. O modelo de FP de éxito tense adiantado e implementado moitos dos cambios que agora o Ministerio toma como sistema a imitar en toda España. Polo tanto a aplicación da nova lei vai ser flexible, de tal forma que en Galicia se manteña a excelencia e se incorporen as novidades.
Foi presentado o evento The Way Startup Summit 2024, que un ano máis convertirá a Vigo no maior foro de emprendemento, innovación e investimento no Noroeste de España e cita de referencia a nivel nacional. O programa de They Way contempla tres grandes escenarios ao redor da innovación, o emprendemento e o investimento, así como a organización de espazos de networking entre os asistentes, co obxectivo de que establezan contactos, intercambien coñecementos e propíciense sinerxias entre eles. The Way desenvolverase os días 9 e 10 de maio abordando temas como os retos de futuro das FinTech, da mobilidade, da alimentación, do retail, do turismo, do deporte ou do téxtil, entre outras áreas.
