Notas de prensa

Os comercios de Ferrol convírtense en museos do traxe tradicional galego

Ferrol acolle do 11 ao 24 de maio a I Mostra Aberta de Traxes. Unha iniciativa pioneira en Galicia que organiza a Asociación folclórica e cultural Terra Meiga co patrocinio das Concellerías de Participación Cidadá e Cultura e a colaboración do Centro Comercial Aberto A Magdalena. Así o avanzaba o alcalde da cidade, Vicente Irisarri, xunto aos edís destes departamentos, Manuel Santiago e Mercedes Carbajales, e o representante da entidade organizadora, Basilio Baamonde. Desde xeito, aqueles que paseen polas rúas do casco histórico a partir da vindeira semana e durante 15 días poderán contemplar nos escaparates dos establecementos comerciais auténticas xoias do folclore e da tradición galega. Un xeito de sacar o arte á rúa e achegárllela á cidadanía.

Neste contexto, o primeiro edil destacaba o novidoso desta proposta, ao tempo que a definía como un verdadeiro exemplo de participación cidadá ao conquerir que dúas entidades como a Asociación de Comerciantes e Terra Meiga unan os seus esforzos para ofrecer á cidadanía ferrolá unha actividade destas características, cuxo obxectivo pasa por poñer en valor a cultura, o folclore e tradición da Comunidade. Ao tempo, Vicente Irisarri agradecía o esforzo de ámbalas dúas asociacións porque “cando se intensifica a actividade medra a capacidade organizativa”. Tamén destacou a sensibilidade dos departamentos municipais implicados que acolleron este proxecto cos brazos abertos e a Terra Meiga por promocionar entre os ferroláns e as ferrolás o patrimonio etnográfico dos nosos ancestros.

Máis polo miúdo, Mercedes Carbajales explicaba que a partir do vindeiro luns 21 locais comerciais do barrio da Magdalena albergarán nos seus escaparates ou en lugares especialmente habilitados para a ocasión, unha selección de traxes, xoias e complementos de finais do século XIX e principios do XX que Terra Meiga foi recollendo polas aldeas a parroquias galegas e incorporando a un fondo propio que conservan no Centro Cultural Carbalho Calero. Nesta liña, a edil destacaba que a posta en marcha desta actividade coincide nun mes moi significativo para a nosa cultura ao celebrarse o Día das Letras Galegas. Un mes no que tradicionalmente se realizaba a prantación do liño, un elemento que durante moitos anos foi empregado como materia prima para elaborar a vestimenta dos galegos e que caía en desuso coa chegada da revolución industrial.

Pola súa banda, Baamonde explicaba que se exhibirán 21 traxes e preto de 50 complementos. Pezas únicas, confeccionadas de xeito artesanal e irrepetibles. Circunstancias estas, subliñaba, que dificultan o poder cuantificar o valor dos obxectos que forman parte da mostra polas horas de traballo empregadas na súa confección e polo seu valor sentimental, ademáis de histórico. Asemade, o representante de Terra Meiga apuntaba que é a primeira vez que se organiza unha exposición destas características, aberta ao público e fóra dos espazos tradicionalmente empregados para elo. Un feito que permitirá que se chegue a un público máis amplo e que facilitará á cidadanía ferrolá tomar conciencia do seu pasado e familiarizarse cos modos e costumes dos seus antergos. Así se poderán contemplar dende traxes de garda e de gala, traxes de campo, zapatos e xoias, así como adornos e complementos para o fogar. E, ao fío, Baamonde agradecía a colaboración prestada dende a Asociación de Comerciantes ao promocionar entre os seus socios a actividade ao tempo que invitaba aos ferroláns e ás ferrolás a coñecer máis polo miúdo os fondos que posúe a dita entidade e que conserva no local que o Concello lle cedía no centro cultural Carvalho Calero. Para elo, unicamente cómpre poñerse en contacto coa asociación.

Finalmente, Manuel Santiago avanzou que paralelamente á Mostra Aberta de Traxes, o Concello ten previsto desenvolver unha serie de actividades complementarias como son as visitas de escolares e as sesións de contacontos.