jueves, 18 de abril de 2024
As persoas interesadas, maiores de 14 anos con vídeos de ata cinco minutos de duración, poderán achegar as súas propostas ata o venres 28 de abril. Esta é unha convocatoria para fomentar a videocreación en galego na segunda rede social máis empregada no mundo. Dende a apertura do prazo de recepción de candidaturas xa se teñen inscrito un cento de vídeos, organizados en dúas categorías, vídeo-opinarmos e vídeo-facermos. En total hai 4.000 euros en premios que se repartirán nun acto a finais de maio en Ourense.
Na actualidade xa se poden ver na canle de Youtubeir@s as candidaturas presentadas. Na categoría de vídeo-facermos poden visualizarse dende receitas de cociña ata vídeos sobre como quitar os puntos negros do nariz ou como facer pasta de dentes para elefantes. Na de vídeo-opinarmos as propostas abordan temas tan diversos como a praga da couza guatemalteca, o amor na rede ou o deporte adaptado, entre moitos outros. O xurado que compoñen Manolo González, María Lado, Manuel N. Singala, María Yáñez e Pablo Lamosa xa comezou o seu traballo de visionado das pezas.
Youtubeir@s é unha iniciativa dos servizos de Normalización Lingüística dos concellos da Baña, A Coruña, Ames, Carballo, Mazaricos, Ourense, Pontevedra, Ribadeo, Santiago de Compostela, Teo e O Grove, así como das universidades de Santiago, A Coruña e Vigo.
A Secretaría de Estado de Turismo vén de emitir a resolución pola que se concede a declaración de Interese Turístico Nacional á Festa da Filloa de Lestedo, en Boqueixón. Con este recoñecemento, Galicia suma xa 10 festividades con este recoñecemento. A Festa da Filloa de Lestedo súmase así ás outras nove que xa contan con este recoñecemento: a Romaría de Nosa Señora da Barca (Muxía), as Carrilanas de Esteiro (Muros), as festas do San Froilán (Lugo), a Feira do Bonito (Burela), a Festa da Historia (Ribadavia), o Entroido de Verín. Tamén a Festa do Marisco do Grove, as Festas de San Roque (Vilagarcía de Arousa) e a Festa da Reconquista (Vigo).
Baixo o título 'Horizontes dos Estudos Galegos e /na Lusofonía', esta nova edición do congreso da AIEG parte do tradicional vínculo entre Galicia e os países lusófonos para promover o debate, a crítica e novas propostas sobre as relacións no espazo cultural, académico e institucional. Farao a través de relatorios, paneis, mesas e sesións plenarias nas que participarán especialistas das tres universidades galegas, pero tamén do ámbito nacional e internacional, que discutirán sobre os campos lingüístico, literario, histórico, económico, antropolóxico, filosófico, sociolóxico e artístico. No marco do congreso tamén terán cabida as actividades culturais, como excursións ou exposicións, especialmente dirixidas á mocidade investigadora; ou a presentación de produtos académicos e proxectos, como o Proxecto Nós, impulsado polo Goberno galego para incorporar a lingua propia de Galicia á vangarda da Intelixencia Artificial.
