Non verter por fora

Vivimos tempos nos que os medios de comunicación buscan , non só dar a noticia, senón ampliar a súa repercusión. O problema é que nesa busca, ás veces, magnifican a nova de tal xeito que acaban por desvirtuala.

É importante recuperar un tratamento máis obxectivo e profesional da noticia buscando beber da propia fonte que a produce; e non de informacións que poden ou non provir da orixinal.

Informar non é minimizar nin magnificar, e se ben a información totalmente obxectiva non existe, debemos procurar contar feitos sen tratar de influír nas emocións da lectora ou lector; a quen hai que presupoñerlle a suficiente capacidade para sacar a súas propias conclusións sobre o tema.

Unha información obxectiva pode xerar estados de opinión que deriven en diversos artigos (agora si, subxectivos) sobre o tema. Pero, se a información nace postulada, non deixa lugar para que o pensamento crítico reflexione sobre o tema proposto.

Polo tanto, debemos aprender a contar o que pasa na sociedade e o que fai cada persoa de xeito obxectivo, informando sobre os ideais e os fins que persegue cada proxecto, para que a lectora ou o lector cree a súa propia posición.

Só informando sen sensacionalismo, seremos capaces de xerar pensamento crítico para un verdadeiro estado de opinión.