Santiago ou Vigo

Houbo un tempo no que a Consellería de Traballo radicaba en Ourense e a de Turismo en A Coruña. A Xunta era preautonómica, e a distribución territorial procuraba compensación xeográfica a un poder emerxente aínda moi novo.

A autonomía medrou, consolidouse, e tomou carta de natureza nunha terra que está a piques de cumprir o cuarto de século de autogoberno.

En exercicio dese autogoberno, Galicia estableceu Santiago de Compostela como capital autonómica e, polo tanto, sede do goberno galego e dos seus diversos departamentos ou Consellerías.

E así levamos anos, e pensabamos que -reivindicacións de A Coruña aparte- o sistema estaba consolidado e non tiña volta atrás.

A proposta socialista, formulada na campaña electoral, de levar a Consellería de Pesca para Vigo é de supor que causou fonda satisfacción en Vigo, preocupación en Santiago e estupor no resto de Galicia.

A preocupación de Santiago veñen de facela patente os representantes dos tres grupos representados no concello compostelán -PP, Psoe e Bng- que se opoñen frontalmente a ese traslado, independientemente da cor política dos propoñentes.

Claro que o factor decisivo para que o Psoe poida cumprir esta promesa electoral vai se-lo PP, xa que para modifica-la Lei que autorizaría o traslado da Consellería fai falla unha maioría cualificada na Cámara do Hórreo de dous tercios, polo que sen o voto afirmativo do Partido Popular non hai nada que facer.

Levar Pesca para Vigo porque é o máis importante porto pesqueiro en moitas leguas, significaría traslada-la Consellería do Rural á Terra Chá lucense, ou a de Medio Ambiente á Devesa da Rogueira aló polos montes do Courel. A de Turismo podería rotar entre a Estación invernal de Manzaneda e a praia da Lanzada, a de Comercio situarse nesa planta que en tempos (urbanísticamente) parece que sobraba en El Corte Inglés de A Coruña, a da Vivenda na macropromoción que Fadesa está a facer perto de Perbes e -en fin- a de Política Territorial, Obras Públicas e Transportes para Baamonde, que é o punto de incidencia da futura autovía A8 coa actual A6.

Vivimos tempos de tales cambios que, alomenos polo de agora, non parece lóxico facer mudanzas.