A mellor profesión

Hoxe en día unha das mellores profesións existentes para calquera mortal é a de ser político. Meu Deus, como cobran!

O alcalde de Cea subiu o seu soldo anual en 14.404 euros; e din que o fixo para compensar a súa marcha da Deputación. A ver se alguén pensaba que se quedaba de parviño. O concello de Barbadás engadiu a máis concelleiros na lista de dedicacións exclusivas; de seis que son cobran cinco. Eu de min ao sexto, levantábame en armas. Quedar sen cobrar! Claro que agora para pagar esas dedicacións, hai que recadar, por exemplo, cobrando as actividades extraescolares dos rapaces.

Máis de dez anos sen cobralas e agora, en plena crise, ale, máis paus para os pais. A algúns conselleiros coñézoos e gustaríame saber cándo lle dedican a concellos esa exclusividade. Xa digo, a mellor profesión hoxe en día.