Cine en silencio

Hoxe en día, a xente nin sabe ir ao cine nin sabe ver cine. Non saben ir porque, moitos, adoitan chegar tarde; e non ao pouco de iniciada a película, senón cando ao mellor xa van quince minutos de proxección, o que implica ruídos e molestias ao pasar por entre as filas das butacas.

Non saben ver cine porque, en vez de atender á película, teñen que atender á cacho saqueta de flocos de millo e ao gran vaso de bebida que levan ás salas, que máis semellan xa un restaurante e non unha sala cinematográfica. Isto tamén fai ruído e deixa, logo, moita porcallada. Dá noxo ver cómo quedan as salas ao rematar a proxección.

Cine en silencio. E xa para rematar, hai que lembrar que unha película abarca dende o primeiro fotograma ata o último. O 99% dos espectadores érguense das butacas tan axiña como poñen os títulos de crédito, nos que case se pode dicir que se conta boa parte da película.