Estrambótica solicitude

Tras un momento de relax, Lucrecia Solana colle os papeis que ten sobre a mesa e tras varias voltas consegue colocalos de tal forma que unha grampadora os ata para que non se perdan.

Axiña mete o taco nunha carpeta azul á que introduce no caixón dun armario de arquivo.

Lucrecia Solana volve á mesa e sorrí ante a letra dunha canción que está a oír pola radio; de estilo hip-hop e que está a falar de todo o habido e por haber.

Neste tipo de cancións sempre se mesturan temas de diversa índole. Coa súa man dereita alcanza dun estante que ten á súa beira unha solicitude na que se dispón a escribir uns datos que falan sobre a necesidade de contemplar unha posta de sol dende o alto dun outeiro que se atopa no Chaira, no monte de Pinouzos, en Baños de Molgas.

Dirixe a estrambótica solicitude ao xefe de negociado de Montes dos Pensamentos Perdidos.