Postura diante de Europa

Os franceses veñen de marcar postura diante da Comunidade Europea, votando "Non" á constitución coa que Europa pretende dotarse. É o primeiro obstáculo importante diante do marco legal futuro, que sen dúbida terá solución política andando o tempo, pero establece unha postura firme diante do que coidamos imparable.

Porque nós, hispanos ou galegos - que o mesmo dá - aceptamos esta Constitución como algo irremediable. Entramos en Europa co retraso que as circunstancias políticas e económicas marcaron, e chegamos á integración case como un premio á insistencia, á resistencia, á constancia.

Por eso, todo o que veña de Europa - sexan axudas, sexa a nova Constitución- é ben vido. Por eso aceptamos a Constitución sen estudiala, sen coñecela. Porque entendemos que se outros a aproban é porque está ben; se todos están de acordo, para nós tamén vale... Temos diante de Europa unha postura de convidados que todo o que reciban dos anfitrións será ben recibido. ¡Que remedio!.

E nestas, que os franceses rexeitan a Constitución. Claro, eles estiveron no grupo dos seis paises promotores da nova Europa, con influencia permanente non só polo seu volume e poboación senón por traxectoria democrática e pedigrée.

Os franceses din "Non" á Constitución, porque saben que poden influir, e dalgún xeito váiselles ter en conta. Velaquí a gran diferencia da súa postura e da nosa diante de Europa. "Diante de Europa", porque nin siquiera asumimos na súa totalidade que Europa somos todos nós.