Campo a través

Quédanme dous minutos para pillar a un caracol na carreira que se está a celebrar campo a través. Saímos da rúa da Igrexa de Baños de Molgas ás tres da tarde baixo un sol de xustiza. Na primeira zancada xa lle saquei ao caracol un metro e pico.

Cando cheguei aos terreos da estrada que leva a Os Milagres, o caracol aínda non atravesara a primeira pedra da rúa á altura da fonte que está na Aira de Arriba. Parei no Parque Ansuíña ata que se me fixo noite.

Preguntei polo gasterópodo e comunicáronme que estaba a deixar baballas noxentas produto do cansazo e do esgotamento. Compadecín del e volvín sobre os meus pasos. Aos dous minutos collino coa man dereita e, logo de que acochara na súa propia cónchega, metino no peto do gabán.

Chegamos á meta xuntos e en harmonía. Agradeceumo sacando os tentáculos e chiscándome o ollo esquerdo.