Galicia, nai velliña soñadora

GALICIA NAI VELLIÑA SOÑADORA

Se buscas a Galicia
en ti tes que atopala
Manuel María

O vindeiro domingo os integrantes do ser colectivo que é Galicia decidimos o noso futuro. É, polo tanto, un día de festa no que en cada papeleta se debuxa un modelo ou un soño de sociedade polo que optar.

Nesta ocasión, opcións e concepcións moi diversas de Galicia loitarán por sumar as vontades individuais precisas para ser unha voz máis no Parlamento; e todo está o suficientemente aberto como para asegurar unha noite electoral emocionante, e chea de vaivéns.

Fica a incerteza de como serán as voces que nos representen, de se veremos no Parlamento consensos ou de se haberá debates que reflictan as realidades que nos son propias. Dúbidas e máis dúbidas que a noite dominical e o transcurso da lexislatura nos irán desvelando.

Só dúas cousa están claras: a primeira, é que cada deputado elixido ten que sentirse depositario e responsable dos soños que representa. A segunda, é que Galicia será o que ela queira como ser colectivo. Bendita democracia!