O ano das cooperativas

O calendario da concienciación social do 2012, convocanos a espertar coma colectivo e descubrir a bondade das cooperativas coma vieiro eficaz para saír da crise, unha ferramenta que fornece a competitividade na “aldea global”, por aquelo de que “a unión fai a forza”, mesmo na loita pola dignificación da comercialización do leite, carne, madeira, productos ecolóxicos, etc. fronte á industria esquilmadora do esforzo e da tensión persoal dos labreg@s por mellorar a alimentación.

Incentivan a rendabilidade, porque alixeiran o peso ecónomico na produción da explotación, cando os prezos do leite e carne están tan baixos, achegando todo o avituallamento a menor custo.

Compre optimizar os recursos da Chaira, dotada para o futuro agrogandeiro, aminorando gastos, mesmo nos eidos estratéxicos da publicidade, novas tecnoloxías, apertura de mercados fóra, camiños a desbrozar para competir neste mundo.

Urxe xestionar novas medidas para loitar contra o minifundismo e improdución de tantos terreos, e ubicar aquí os centros de poder da industria agroalimentaria. Hai cooperativas en todos os ámbitos: consumo, ensino, crédito, etc., pero aquí son as gandeiras as que levan a pauta.

Benia a consigna a prol delas porque é un galano esta aprendizaxe a traballar, soñar e deseñar en grupo. Unha oportunidade para desterrar o tópico de que non somos capaces de integrarnos en grupo, a non ser que vivamos na diáspora.

Os que temos a fortuna de facer andaduras co mestre Pousa Antelo, “chairego de honra”, fomos interiorizando este xeito de organizar a economía de base, a autoxestión, e laiamonos de que pioneiros coma él con tanta experiencia e coñecementos no cooperativismo, non estivesen á fronte da administración ou fosen escoitados para alumearnos por este camiño, pero deixamos pasar o sol pola porta sen aproveitar o seu calor.

Si noutros países este movemento foi arrequecedor, aquí tamén podemos adoptalo. En Portugal o 70% do leite canalízase a través delas. Arestora estas agrupacións exprimen o inxenio argallando pensos para alimentacións máis sas e completas para o gado, e con menos inversión. Ofrecen servizos de asesoramento, cada volta máis complicados, de identificación de reses, vendas,etc.