Libres da SGAE

A Sociedad General de Autores de España tense convertido nun auténtico azoute de entidades, empresas ou particulares que utilizan publicamente algún tipo de música sometida ó pago de dereitos do que a sociedade é titular.

Que algo hai que dicir en relación co traballo desta entidade e no favor desta empresa que ten representacións provinciais desde que temos memoria e de senmpre exerceu inspección detida e meticulosa en todo tipo de actividades festeiras ou non nos que houbese utilización musical, destacando a necesidade de que as emisoras de radio declarasen os ingresos por notas necrolóxicas para cotizar como entidades que utilizan música na súa programación habitual. Se son agora tan problemáticos é por eficientes no seu traballo, no que moitos consideran que se extralimitan.

Andan os músicos do Concello coruñés de Cerceda preocupados por eses dereitos que a Sociedade di defender, e tentan conseguir independizar aquel territorio desta sociedade, proclamando ó concello como “Cen por cen libre da SGAE”.

Non pode ser a SGAE tan feroz como a pintan, xa que só pode intervir nos dereitos que ten encargado defender. E todo creador que posúa música feita por el, que queira non ser defendido por esta entidade non pode ser obrigado a ser rerpesentado por ela.

Que moitas veces se considera á Sociedad como a única defensora dos dereitos dos creadores, cando non é máis que defensora dos que lle encargan ser defendidos. E outras entidades hai que se encargan da defensa e intervención en parcelas culturais sobre as que teñen competencias.

Ser libres da SGAE significa non utilizar música sobre a que esta entidade ten dereitos. E os creadores de Cerceda parecen estar nese camiño, utilizando música propia, sobre a que teñen dereitos exclusivos. E a asociación cultural Lucerna defende a música libre, como hai programación en Internet libre pola que non hai que cotizar.

Os de Cerceda son os primeiros de Galicia. Pero seguro que non serán os últimos.