Lectura

Resulta axiomática a importancia que a lectura ten na formación intelectual e cívica da persoa; a tal punto que esta evidencia lle fixo decir a Nicolás de Avellaneda, xornalista e político arxentino da segunda metade do século XIX: “cando escoito decir que un home ten o hábito da lectura, estou predisposto a pensar ben de él”.

Está universalmente aceptado que a lectura é a porta á cultura: efectivamente pode asegurarse que sen aquela difícilmente se produce o acceso a ésta; daí que as institucións que na nosa sociedade teñen responsabilidades neste eido se apliquen en artellar formas polas que achegar á cidadanía esa convicción e consecuentemente esa práctica.

Supoñemos que nese marco se situaba a iniciativa do concello de Foz coa organización do Maratón de 24 horas de Lectura que durante varios anos se víu celebrando arredor do
Día do Libro; unha efeméride que, polo habitual, xa esperábamos, pero que nesta ocasión (obviamente era polo mes de abril), non o houbo. Non coñecemos as causas que aconsellaron retiralo da programación, porque nada se dixo ó respecto ¿Cansancio? ¿Falta de interese nos posibles lectores? Retirouse, e punto…

Unha interesante forma de promoción é a través dos “clubes de lectura”, que na nosa bisbarra veñen funcionando en varias localidades; posiblemente sexa ésta unha modalidade mais efectiva que o “maratón”, ó engadir aspectos transcendentais na técnica e aproveitamento da didáctica do feito de ler: nel se xuntan un grupo de persoas que len un libro ó mesmo tempo na súa casa para logo na xuntaza, semanal por exemplo, coa participación de un moderador, comentar o lido producíndose o contraste de opinións sobre o estilo literario, a acción, os personaxes… que deriva moitas veces hacia outras consideracións, porque “quen le moitos libros e non pensa nada sobre eles, é unha estantería”. Dous son fundamentalmente os alicientes desta modalidade: a lectura persoal e íntima por unha banda e a posibilidade de compartir esa lectura con outras persoas pola outra; é, en definitiva, as ventaxes do “traballo en equipo”, ó que lamentablemente somos pouco dados.

Alguen dixo que analfabeto non é aquel que non sabe ler; analfabeto é aquel que sabendo ler, non o fai.