191 minutos de televisión

“La televisión pronto llegarᔠcantaron os nosos devanceiros agardando do novo medio que fose un elemento do progreso como no seu momento se agardou do ferrocarril para Galicia.

Pensábase que a televisión superase ós xornais e ás radios, pero a imaxe non logrou matar a estrela da radio, senón que se demostrou que os medios podían convivir complementándose.

E a televisión implantouse nas nosas vidas, nas nosas casas, abosorbendo a nosa atención como ningún outro medio. Quen pensou que era un medio que permitía a participación do espectador nas mensaxes emitidas equivocouse de medio a medio. E na actualidade, salvo excepcións honrosas pero escasas, ofrece un panorama pobre e cutre, do que forzosamente percibimos cantidades masivas pola forza do hábito.

Os galegos vemos por termo medio a televisión un total 191 minutos ó día. E se esto nos parece un despropósito, somos os españois que menos o facemos, xa que a media do estado foi de 220 minutos o pasado ano, destacando os casteláns-manchegos con 258 minutos.

A televisión que na actualidade se consume é, na súa maior parte, de entretemento, concursos, potenciación de personaxes de dudosa exemplaridade, resultando unha penosa mostra de labor audiovisual que enche sen alimentar.

191 minutos diarios de televisión, da televisión actual, é alienante e evidencia outras carencias relacionadas coa ocupación do tempo libre, que a lectura, a música ou as camiñatas poderían encher.

Moi baixo ten caído o medio despois de tantas esperanzas. E sen embargo a televisión ten futuro, unha vez supere o feble presente.