XLVI Semana de Música do Corpus de Lugo (3)

Luns, 28 de maio. Casa do Saber da USC. Hora 20,30. Massimo Spadano, violín.
Fernando López Pan, clave

Apreciacións sobre a BWV 1015, Sonata para violín e clave de Johan Sebastian Bach.


Sic transit gloria mundi.
Musica donum dei

Está Deus aquí, baixou entre nubes no solpor álxido da música friccionada por arcos de luces e cordas enfiadas de melancolía, e vén baixando entre máxicos cabalos alados en socalcos de aire brando, macio e imposíbel, cruzando éteres estiñados de feitizo e meiguería.

Bondade, pracer, empatía e verdade, abránguennos, cércannos para gozar nun todo de sensacións e de complicidade. Estanza de harmónicos e de notas que reptan arrastradas polas fachadas empedradas de beleza en edificios barrocos cargados de adornos dentro das corcheas e fusas acompasadas.

Andante viscoso como a auga caendo en gotas na mar tranquila dun agosto quenturento, solpor de notas dun día cargado de calores estivais, e as notas . . concordando, libando amenceres sinxelos na tranquilidade mórbida dun sono esquecido que non esperta nin se dorme. Estado mental interior nun bocado dos deuses.

Presto estamos chegando a un final rápido, de notas e embarque de sensacións dirixidas á carencia e á suavidade dos recordos envidiados pola clave e recordados polo violín, que Spadano cuida e reinventa na súa consciencia interpretativa, e quizás tan medida que supón unha verdade a medias, pero nunca un corazón desaborido, senón medido e distanciado. Trinos de paxaros e luces de vida saen dos seus adentros de melancolía.


(Escrito mentres se escoitaba aos dous mestres)