Opinión en Galicia

Buscador


autor opinión

Editorial

Ver todos los editoriales »

Archivo

O cabalo de Santiago, no Pazo de Raxoi, érguese aos pés indignado

sábado, 30 de julio de 2016
Por que meter e facer responsábel ao Apóstolo das nosas propias desfeitas? Voume referir só a lingua e cultura galegas.

Señor Santalices, lin atentamente o seu solemne discurso. Nada mal fixo Santiago, o Apóstolo, para irlle afear publicamente a conduta na súa propia catedral para que teña que vir arranxarnos algo neste asunto.

Todo o seu grupo actual, principalmente o señor Feijoo, D. Jesús Vázquez, D. Anxo Lorenzo, etc... queimaron miles libros en lingua galega para o ensino. Santiago non é culpábel.

Foi o señor Feijoo o que entrou berrando como cabalo de Atila que devastaría o decreto da lingua galega elaborado por don Manuel Fraga, conservador el, co consenso de todos. Santiago non é culpábel.

Ben axiña impuxo o señor Feijoo o “decretazo” que arruinou, desprestixiou e fixo desaparecer na práctica a lingua das esferas oficiais e mesmo en áreas do ensino e introxectou nas conciencias das xeracións novas e vellas a idea suicida de que o noso non vale para nada. A tal grao, que mesmo mereceu censura das máis prestixiosas institucións da Galiza, da Europa e do mundo cultural universal. Cantas mentiras altisonantes propagaron a cotío¡ E cantos euros¡ Santiago non é culpábel.

Envolveuse na bandeira galega para chorar sensibleiras bágoas oportunistas en momentos solemnes coma se de cativos malcriados ou adolescentes inmaturos se tratase. Santiago non é culpábel.

Bilingüismo harmónico, da man desa muller que defende a mesma miseria cultural na chamada Galicia Bilingüe, que nin é Galicia nin sequera é monolingüe nun correcto castelán. Que bonitos aparecen nas fotografías das hemerotecas eses abrazos solidarios na causa do demérito á lingua! Son os militantes da máxima categoría na persecución e eliminación dela. E aí, todos nós, coma pampas testemuñas e consentidores culpábeis. Vemos a miseria cultural na que nos meten e temos que dicir que chove. Santiago non é culpábel.

Señor Santalices, veñen agora con esa andrómena de que Santiago nos bote unha man. E todos anuentes na Catedral dicindo: amén!
Non lles parece unha profanación, non xa da catedral, senón do pobo a quen representan? Que hipocrisía maiúscula! Non estarán a facer electoralismo para “dummies” valéndose ata da relixión?

Cando teñen todo o poder nas mans fai falta ser mixiricas abondo como para dicir solemnemente: Señor Santiago “é moito o que pido e pouco o que somos quen de ofrecer”.

Vennos vostede hoxe con esas milongas? Non, señor Santalices. Por iso non pasa nin o cabalo de Santiago do Pazo de Raxoi. Non me estraña que se erga aos pés de diante alporizado, enrabechado.

Vostede, Presidente do Parlamento, o señor Presidente do goberno e a Xunta en pleno, e moitos outros que saíron nas fotos, teñen o poder, a tixola e o mango. Vostedes levan gobernado oito anos e insistindo na teima da destrución de todo o nós colectivo e calumniándonos a todos, dicindo que nos negamos a abrírmonos ao mundo universal. Non lles parece unha blasfema política?

Fomos nós, pobo común, quen nos botamos ao mundo e á emigración. Quen levamos con fachenda a lingua e a cultura galegas polo mundo adiante. E como pobo común, nós e os devanceiros, creamos e conservamos a nosa identidade nos intres máis duros da nosa historia.

Se se erguen todos eses que vostede citou, e os que adrede silenciou, (digamos Bóveda), non terían algo moito que dicirnos á cara? A vostedes, que estaban alí todos xuntos na catedral, non lles parece unha falta de ética común, social e colectiva? Nós, coma o servo infiel e nugallán do evanxeo enterramos o denario, o talento, e logo discursamos. Hai un baleiro de auténticos valores e de coherencia.

E logo pídelle á Igrexa: “fago votos para que a Igrexa galega –clero e laicos– en comuñón coa Igrexa universal, manteña e acentúe a súa sensibilidade respecto ao idioma e a cultura que nos identifican como pobo, participando activamente na tarefa común de defender, mellorar e estender ese legado inigualable”.

Non me estraña que ata o cabalo branco de Santiago rinche e nos chame a todos hipócritas e mentireiros. E que debera facer falta pedirlle iso á igrexa? Se hai que pedirllo é que está a traizoar ao pobo galego.

Cando todos nós fomos metendo no baúl das miserias o Concilio Galego, que deixou claro dabondo a postura desa Igrexa, vimos agora todos xuntos, e digo todos, a laiármonos para seguirmos na meirande das inconsecuencias. Xa. Pedímosllo a Santiago pero para seguir a peor.

Penso que xa é tempo de anoxarnos e mirármonos todos no cabalo branco de Santiago que rebrinca encabuxado no Pazo de Raxoi e se ergue aos pés de diante para dicirnos como pobo: Nunca máis! Nin como políticos nin como crentes me volvades con esas andrómenas e pantomimas. A que vindes á Catedral?

Esa relixión que vostede discursou, señor Santalices, non é a fe de Xesús, o Cristo. Nin sequera a do Concilio Galego. Ese discurso non ten a categoría do Apóstolo. É simplemente un armadillo para cubrir expediente.

Pero é que nin politicamente é correcto. Santiago non vai facer o que temos que facer nós. Salvo botarnos á cara as preguizas e malas prácticas. “Non quen di: Señor!, Señor!, entrará no reino dos ceos, senón quen cumpre a vontade de Deus”. Xa abonda de mentiras e de pregarias ocas e baleiras. Que razón tiña Curros: “Se este é o mundo que eu fixen...”.

E a Igrexa, todos nós, examinemos moi seriamente cal é a nosa responsabilidade, que certamente é grande desde hai ben séculos. Con luces e sombras.

O discursiño é unha interpelación forte en moitos sentidos. Eu limiteime á lingua e á cultura. Corresponderalles a outros as cumpridas análises noutros eidos, por exemplo no social, no de Angrois, etc... Entre todos completamos as teselas deste amplo mosaico.

O cabalo de Santiago, no Pazo de Raxoi. érguese aos pés indignado.
Campo Freire, Xaquín
Campo Freire, Xaquín


Las opiniones expresadas en este documento son de exclusiva responsabilidad de los autores y no reflejan, necesariamente, los puntos de vista de la empresa editora


ACTUALIDAD  
PORTALES  
SERVICIOS  
ENLACES  

RSS Válido

PUBLICIDAD
ACTUALIDAD GALICIADIGITAL
Blog de GaliciaDigital
PUBLICIDAD
Deputación de Ourense
PROMOCIÓN
PUBLICACIONES
Publicaciones
Publicaciones Amencer
Revista Egap
Obradoiro de Artesania