viernes, 19 de abril de 2024
Nota de prensa del Gabinete de Comunicación del PPdeG:
O presidente do PPdeG, Alberto Núñez Feijóo, pediu o voto da maioría de galegos que queren gobernos desde o primeiro día e non perder tempo e diñeiro con enfrontamentos e divisións. Neste senso, fixo fincapé en que os populares propoñen gobernos unidos, sólidos, cohesionados que funcionen desde o primeiro día e que desde o primeiro día non se dediquen a outra cousa que a cumprir co seu deber.
Do mesmo xeito, Feijóo engadiu que desde o primeiro día non se pode perder un minuto noutra cousa que non sexa combater as consecuencias da crise e crear oportunidades, en lugar de perder o tempo quitando bandeiras españolas e poñendo caixas de cartón para votar referendums de independencia. Ademais, cre que o que cumpre facer desde o primeiro momento é atender aos veciños e buscar os mellores servizos sociais e non poñerse ao servizo dunha ideoloxía ou dun ego.
Feijóo facía fincapé en que non están as cousas para andar perdendo o tempo e o diñeiro e, nesta liña, lembrou que non houbo gobernos que perderán máis o tempo que os de coalición de esquerdas e nacionalistas nin houbo gobernos que perderán máis o diñeiro que os xestionados polos socialistas. Como recordou, Galicia e España non o aceptaron e por iso decidiron cambiar o Goberno por outro que, como o actual, está tentando recuperar, grazas ao esforzo e o apoio da xente, o diñeiro e o tempo perdidos.
O líder do PPdeG salientou que non houbo un goberno en toda a historia de España que xestionara máis presuposto público que o último goberno socialista e, sen embargo, o goberno co que se evitou o rescate, co que se corrixiu o déficit, co que se pagan as débedas e co que a economía volve crecer e volve crearse emprego é o dos populares. Do mesmo xeito, lembrou que non houbo unha Xunta en toda a historia da Autonomía que xestionara máis presuposto público que o bipartito e, pola contra, agora páganse as facturas e págase antes aos provedores, constrúense e refórmanse hospitais públicos e centros de saúde, hai máis prazas públicas de servizos sociais, máis ordenadores e idiomas no ensino público e Galicia crece e baixa o desemprego. Neste senso, destacou que hai unha maioría de galegos que o que queren é que os gobernos gobernen e iso é o que fixeron os populares en todo momento e a eles lles piden a súa confianza.
O líder dos populares galegos asegurou que hai unha maioría de galegos que se senten orgullosos de ser do seu concello, de ser galegos e ser españois, porque é perfectamente compatible; unha maioría de galegos que están coa convivencia que nos demos na Constitución e no Estatuto, porque saben o que custou e non o rexeitan e desprezan; e unha maioría de galegos que están na moderación e no respecto á diferenza e non na imposición e o extremismo. Do mesmo xeito, afirmou que hai unha maioría de galegos que queren unha xestión responsable, cun proxecto a seguir, con obxectivos a cumprir; que quere normalidade e gobernabilidade nas institucións; que queren ser representados por servidores humildes e non pola arrogancia e a prepotencia; e que prefiren a cooperación e a unidade en lugar da división e o confrontación permanente.
Nota de prensa del Gabinete de Comunicación del PSdeG:
O secretario xeral do PSdeG, José Ramón Gómez Besteiro, apelou á xente que aínda non ten decidido o seu voto para que elixan alcaldes con voz propia necesarios para defendelos da irresponsabilidade da dereita, e non delegados do PP e da nefasta xestión de Rajoy e Feijóo. Para exemplificar esa mala xestión, o socialista aludiu a un recente estudo que alerta de que a hucha das pensións pode esgotarse en cinco anos. Rajoy non para de sacar cartos do Fondo de Reserva da Seguridade Social, o que coñecemos como a hucha das pensións, que os socialistas deixamos con 67.000 millóns. En só tres anos, Rajoy gastou a metade dese diñeiro, dixo. En Galicia e en Lugo, que temos moita xente maior con fillos no paro, vemos como o que parecía intocable, a dereita o destrúe por mala xestión económica.
En Galicia, lonxe de botar unha man ás persoas maiores, Feijóo dedícase a recortar prestacións sociais e servizos sanitarios nos hospitais da Xunta. Se Rajoy fai perigar as pensións desde Madrid, e Feijóo recorta os servizos sanitarios dende a Xunta, como imos a permitirnos ter tamén un Alcalde de dereitas que baixe a cabeza ante esta situación?, preguntouse Besteiro. Necesitamos alcaldes como os do partido socialista, capaces de ter o concello saneado e seguir prestando servizos aos maiores, establecendo unha barreira de protección fronte a irresponsabilidade social da dereita.
O socialista afirmou que á dereita e a Feijóo, Lugo segue a quedarlles moi lonxe, sobre todo á hora de amosar un mínimo de sensibilidade cos seus veciños, e reiteroulle a oferta da Deputación de financiar o servizo de Hemodinámica as 24 horas. Pídolle a Feijóo que exerza por unha vez de Presidente de todos os galegos e supere dunha vez por todas que o PP non goberne en Lugo, sobre todo porque vai a seguir sen gobernar, dixo.
O secretario xeral do PsdeG trasladoulle aos lucenses que Lugo non debe cambiar o alcalde que máis a fixo crecer como cidade por unha persoa que renega dos seus veciños. Porque o máis triste, dixo, é que o PP non só non fai nada desde a Xunta por esta cidade, senón que os emisarios do PP na cidade e na provincia seguen a defender irracionalmente os argumentos do seu partido por riba dos argumentos dos veciños e das súas familias.
Así, o PP non so demostra que é capaz de traizoar a aqueles que lle votaron, senón tamén ser un partido completamente insensible cos problemas dos que lle votaron e que eles mesmos causan. Non lle deades a confianza a unha persoa que vos pide o voto e logo vota en contra de Lugo no Parlamento galego! Non cambiedes a Orozco por un renegado dos lucenses!, concluíu.
Nota de prensa del Gabinete de Comunicación del BNG:
O portavoz nacional, Xavier Vence, apelou ao electorado indeciso co argumento de que BNG-Asembleas Abertas é a única alternativa nacionalista para quen lle doa a situación crítica do país como consecuencia das políticas de recortes e de submisión a Madrid do PP, e instou a ir votar o 24M para non arrepentirse de resultados inesperados o 25M.
Aínda hai moitos galegos e galegas que teñen dúbidas e a eles me dirixo para dicirlles que o voto BNG-Asembleas Abertas ten un valor dobre: é clave para derrotar ao PP nos concellos de toda Galiza e non só nun puñado de cidades, e representa a única alternativa para construír un proxecto nacionalista no conxunto do país.
Plantamos cara á dereita en todo o territorio, non nun cantón, nin nun selecto número de concellos, subliño Vence no mitin de Coruña. Fronte ao cantonalismo e o culto ao efémero, BNG-Asembleas Abertas ten un proxecto claro, sólido e fiable para toda Galiza desde os concellos, e nos presentamos co aval do traballo feito alí onde gobernamos.
O dirixente nacionalista puxo en valor a traxectoria do candidato Xosé Manuel Carril, traballador incansable, exemplo de honradez e de compromiso, loitador de todas as causa xustas, sempre con quen máis o precisa, ningunha loita social nesta cidade lle foi allea, dixo, porque Carril defende unha Coruña de benestar para todos e todas, fora do puñado de privilexiados do Parrote. Por iso, o 24M a veciñanza porá a este PP onde lle corresponde, no faiado cos traxes que cheiran a naftalina, proclamou Vence, convencido de que mesmo os votantes moderados darán as costas a un PP radicalmente antisocial e antigalego.
Vence cualificou a Feijióo de hooligan dos recortes con especial saña na sanidade e na educación públicas, declarando sen complexo algún que sobran universidades . Unha moda á que vimos que se apuntan os novísimos madrileños como Pablo Iglesias. Supoño que non pensa pechar a Complutense, así que debe ser en provincias onde sobran universidades, que rápido aprenden as vellas leccións, ironizou.
Carril, que fixo un emotivo agradecemento ás persoas asinantes do manifesto de apoio a súa candidatura, deixou claro que o 24 de maio hai que optar pola xustiza social que defende o BNG ou polos privilexios que defende o PP.
Se queremos ser persoas e non cifras bancarias, se queremos pan e non fame, se queremos traballar na terra e non emigrar, se queremos ética e non corrupción, se queremos vida e non recortes,
o 24 de maio hai que votar BNG-Asembleas Abertas, proclamou.
Carril pediu o voto cunha síntese do que defende BNG para a cidade da Coruña: Traballo, teito, benestar, xustiza social, acabar coas fronteiras entre ricos e pobres e todo apostando pola nosa soberanía, concluíu.
O director xeral de Relacións Exteriores e coa UE, Jesús Gamallo, participou na sesión plenaria do Comité Europeo das Rexións (CdR), onde Galicia presentou 21 emendas a catro dos ditames sometidos a aprobación. Un dos máis relevantes para a comunidade foi o ditame sobre a ferramenta de facilitación transfronteiriza. Calcúlase que a eliminación do 20% das barreiras e obstáculos xurídicos e administrativos actuais entre rexións de fronteira na UE -entre as que se atopa Galicia, que conforma unha Eurorrexión xunto co Norte de Portugal- permitiría aumentar o seu PIB nun 2% e crear nelas ata un millón de empregos.
InnovArt 24, o maior evento en Galicia de promoción e difusión das ensinanzas artísticas, de idiomas e deportivas propicia o encontro entre as vocacións e os profesionais, e facilita que o alumnado de diferentes niveis educativos se familiaricen e tomen contacto cos eidos da arte dramática, as artes plásticas e deseño, a conservación e restauración de bens culturais, a danza, as ensinanzas deportivas, os idiomas e a música. A feira conta cunha zona de 4.100 m² no Museo Centro Gaiás, na que os visitantes poden participar en obradoiros de artes plásticas e deseño, traballos de conservación e restauración de bens culturais, actividades deportivas didácticas de música, arte dramática e danza, así como de idiomas. Tamén se ofrecen mostras e exhibicións das distintas ensinanzas, concertos, conferencias e espectáculos escénicos en directo.
