viernes, 19 de abril de 2024
Nota de prensa remitida por el Gabinete de Comunicación de la Xunta de Galicia:
Teatro Ensalle estrea o xoves 5 de marzo en Vigo o seu espectáculo Las calles corrían por las calles, a nova proposta que a compañía que rexenta a sala homónima da cidade olívica produciu este ano con subvención da Agadic (Axencia Galega das Industrias Culturais) e que exhibirá ata outubro en 15 escenarios de España e México.
Baixo a dirección de Pedro Fresneda, Artús Rei, Raquel Hernández e María Costa interpretan esta montaxe, na que Ensalle volve amosar o seu estilo persoal de traballo, que se separa dos contidos argumentais e das experiencias dos personaxes para centrase nun compromiso coa escena como expositor de inquietudes sociais.
Nesta ocasión, o espectáculo construído cos actores a partir dun texto escrito por Fresneda dirixe a mirada cara á propia experiencia da compañía ao longo de máis de doce anos, indagando no aprendido de mestres e artistas, pero tamén nas rúas, nas casas, nos bares e en calquera lugar de encontro. Así, tomando como título a frase las calles corrían por las calles extraída do libro El señor presidente do Nobel guatemalteco Miguel Ángel Asturias, Ensalle reivindica a curiosidade e a creatividade fronte á mediocridade que, ao seu modo de ver, se estende cada vez en máis ámbitos do comportamento humano.
Este é un dos 26 espectáculos galegos beneficiarios das axudas que a Axencia Galega das Industrias Culturais da Consellería de Cultura, Educación e Ordenación Universitaria destinou en 2014 á dinamización escénica en Galicia, polas que se concederon o pasado ano 600.000 euros. Precisamente, o Diario Oficial de Galicia (DOG) publica hoxe as novas bases que rexerán a convocatoria para 2015.
O director da Agadic, Jacobo Sutil, asistirá ás 22:00 horas á primeira das catro representacións de Las calles corrían por las calles que se levarán a cabo ata o domingo no Teatro Ensalle. O espazo vigués será o punto de partida para a prolongada xira que se desenvolverá ata o mes de outubro polos escenarios españois e mexicanos e que terá como destinos, entre outros, Aranjuez, Santander, Tenerife, Valencia, Bilbao, Cáceres, Veracruz, Chiapas, San Luis de Potosí, Guanajuato, Yucatán ou Sinaloa.
Fotografía: Gabinete de Comunicación de la Xunta de Galicia
O director xeral de Relacións Exteriores e coa UE, Jesús Gamallo, participou na sesión plenaria do Comité Europeo das Rexións (CdR), onde Galicia presentou 21 emendas a catro dos ditames sometidos a aprobación. Un dos máis relevantes para a comunidade foi o ditame sobre a ferramenta de facilitación transfronteiriza. Calcúlase que a eliminación do 20% das barreiras e obstáculos xurídicos e administrativos actuais entre rexións de fronteira na UE -entre as que se atopa Galicia, que conforma unha Eurorrexión xunto co Norte de Portugal- permitiría aumentar o seu PIB nun 2% e crear nelas ata un millón de empregos.
InnovArt 24, o maior evento en Galicia de promoción e difusión das ensinanzas artísticas, de idiomas e deportivas propicia o encontro entre as vocacións e os profesionais, e facilita que o alumnado de diferentes niveis educativos se familiaricen e tomen contacto cos eidos da arte dramática, as artes plásticas e deseño, a conservación e restauración de bens culturais, a danza, as ensinanzas deportivas, os idiomas e a música. A feira conta cunha zona de 4.100 m² no Museo Centro Gaiás, na que os visitantes poden participar en obradoiros de artes plásticas e deseño, traballos de conservación e restauración de bens culturais, actividades deportivas didácticas de música, arte dramática e danza, así como de idiomas. Tamén se ofrecen mostras e exhibicións das distintas ensinanzas, concertos, conferencias e espectáculos escénicos en directo.
