viernes, 19 de abril de 2024
Nota de prensa remitida por Festa do Queixo de Arzúa:
Na Capela da Madalena de Arzúa tivo lugar a elección dos gañadores do CONCURSO DE CARTEIS ANUNCIADORES da 35 Festa do Queixo Arzúa 2010.
O xurado estivo composto por cinco membros: Juan Carlos Vázquez Otero, profesor de música e pintor; Xosé Luis García López, Concelleiro de Cultura do Concello de Arzúa e presidente da Asociación da Festa do Queixo; Oscar Villanueva Otero, profesor de debuxo no IES de Arzúa; Magdalena Carreira, mestra de primaria do CEIP de Arzúa e Ramón Roldán, consultor de comunicación, todos eles cualificados e designados pola Asociación Festa do Queixo.
Un ano máis, as pezas chegaron desde os distintos puntos do país. Ademais destaca o aumento de propostas recibidas, 41 en total, que supón un récord con respecto a edicións anteriores. Tamén son diversas as técnicas empregadas este ano na elaboración dos carteis: oleo, deseño gráfico, fotografía, ou ceras.
Logo das valoracións e deliberacións oportunas, o xurado emitiu o seu fallo concedendo o primeiro premio ao cartel nº 2 titulado Imaxina. O autor, Daniel Camino Barral, gañador do ano pasado, volve gañar o primeiro premio e a súa obra será de novo o cartel anunciador da 35 edición da Festa do Queixo de Arzúa 2010.
O xurado valorou a creatividade e a orixinalidade deste cartel, que consigue unha magnífica composición de gran impacto visual. O autor conxuga a fotografía, na que destaca un especial traballo de iluminación, coa tipografía para acadar o resultado final deste orixinal cartel. Segundo Daniel Camino, os bonecos que sosteñen o queixo representan ás diferentes persoas que de algunha maneira traballan e apoian o queixo de Arzúa.
Todos os carteis formarán parte dunha exposición itinerante que se amosará nas distintas parroquias de Arzúa. Durante os días de celebración da Festa do Queixo, a dita exposición volverá ao centro da Vila para que todos os visitantes poidan apreciar a creatividade dos participantes desta edición do concurso.
O acto de entrega de premios incluirase no Programa Oficial de Actos da 35 Festa do Queixo.
O director xeral de Relacións Exteriores e coa UE, Jesús Gamallo, participou na sesión plenaria do Comité Europeo das Rexións (CdR), onde Galicia presentou 21 emendas a catro dos ditames sometidos a aprobación. Un dos máis relevantes para a comunidade foi o ditame sobre a ferramenta de facilitación transfronteiriza. Calcúlase que a eliminación do 20% das barreiras e obstáculos xurídicos e administrativos actuais entre rexións de fronteira na UE -entre as que se atopa Galicia, que conforma unha Eurorrexión xunto co Norte de Portugal- permitiría aumentar o seu PIB nun 2% e crear nelas ata un millón de empregos.
InnovArt 24, o maior evento en Galicia de promoción e difusión das ensinanzas artísticas, de idiomas e deportivas propicia o encontro entre as vocacións e os profesionais, e facilita que o alumnado de diferentes niveis educativos se familiaricen e tomen contacto cos eidos da arte dramática, as artes plásticas e deseño, a conservación e restauración de bens culturais, a danza, as ensinanzas deportivas, os idiomas e a música. A feira conta cunha zona de 4.100 m² no Museo Centro Gaiás, na que os visitantes poden participar en obradoiros de artes plásticas e deseño, traballos de conservación e restauración de bens culturais, actividades deportivas didácticas de música, arte dramática e danza, así como de idiomas. Tamén se ofrecen mostras e exhibicións das distintas ensinanzas, concertos, conferencias e espectáculos escénicos en directo.
