jueves, 25 de abril de 2024
O Diario Oficial de Galicia (DOG) publica hoxe o nome as premiadas do concurso Comunicar en Igualdade, co que a Secretaría Xeral da Igualdade pretende recoñecer e recompensar os traballos xornalísticos que teñan contribuído á defensa e difusión dos valores da igualdade entre mulleres e homes, así como á loita contra a violencia de xénero. Xornalistas Galegas, xunto con Sara Vila e Montserrat Dopico recibirán o premio na categoría para profesionais do xornalismo e Uxía Castro, Lucía Parrilla del Río e Silvia López na de alumnado universitario.
Na modalidade para profesionais do xornalismo o xurado escolleu como o primeiro premio, dotado con 6.000 euros, o texto As mulleres na opinión: un elefante rosa no medio das redaccións" do grupo de traballo As Mulleres na Opinión de Xornalistas Galegas. O traballo O noso toque de queda de Sara Vila Alonso, recibirá o segundo premio, valorado en 3.000 euros, mentres que o terceiro, de 2.000 euros, recaeu na peza Sesé Mateo: a palabra que resiste á morte, de Montserrat Dopico González.
Na categoría reservada para o alumnado universitario, Uxía Castro Martínez recibirá o primeiro premio, de 4.000 euros, polo traballo Eles gobernan, elas aman. Os mitos do amor romántico. O texto Un relato de mulleres nas minas do Bierzo valeulle a Lucía Parrilla del Río o recoñecemento do segundo posto nesta categoría, cunha dotación de 2.000 euros. Pola súa parte, Silvia López López será a galardoada co terceiro premio, de 1.000 euros, ao participar co traballo Nun sistema tan opresivo para a muller ser monxa era unha opción cómoda.
O premio Comunicar en igualdade recoñece os traballos informativos ou pezas publicadas de forma individual ou colectiva por profesionais do xornalismo, así como os traballos xornalísticos presentados por alumnos e alumnas con matrícula nalgunhas das titulacións do Sistema Universitario Galego (SUG) no curso 2018-2019. A dotación económica, que vai dos 6.000 aos 1.000 euros, realízase con cargo aos fondos do Pacto de Estado contra a Violencia de Xénero.
O xurado estivo presidido polo director xeral de Políticas Culturais, na secretaría unha persoa designada pola Secretaría Xeral da Igualdade e como vogais, as persoas integrantes da Comisión Asesora de Publicidade non Sexista. En ambas modalidades, seleccionáronse os mellores traballos segundo criterios de calidade, esforzo investigador e de sensibilización e axeitado tratamento informativo dende a perspectiva de xénero.
Co premio Comunicar en Igualdade trátase de premiar as boas prácticas respecto dun tratamento axeitado de asuntos de cobertura informativa diaria como poden ser o sexismo na publicidade, outros modelos de masculinidade, a violencia machista, a trata de seres humanos con fins de explotación sexual, a violencia de xénero en colectivos especialmente vulnerables, a situación da muller nos diferentes ámbitos, así como os temas relacionados en xeral coa perspectiva de xénero e coa desigualdade por razón de xénero.
A difusión pública nos medios de comunicación dos asuntos relacionados coa perspectiva de xénero, coa igualdade entre homes e mulleres e coa loita contra a violencia de xénero, como expresión máxima da desigualdade, ten unha importancia decisiva no labor de concienciación social sobre a consecución deses obxectivos que deben ser irrenunciables para a nosa sociedade. Por iso, considérase que a Xunta pode exercer un labor positivo neste sentido mediante a introdución dun estímulo ou incentivo para fomentar a publicación e a investigación sobre esas materias, tanto nos/nas profesionais do xornalismo como no alumnado das facultades e escolas universitarias.
A Cidade da Cultura reunirá estes días as persoas representantes dunha vintena de linguas minoritarias de Europa. Será durante a asemblea xeral e a conferencia anual da Network to Promote Linguistic Diversity (NPLD), unha organización de ámbito europeo cuxa finalidade é promover a diversidade lingüística na UE. Entre os seus membros figura, desde a súa creación, a Xunta de Galicia, que, a través da Consellería de Cultura actúa como anfitrioa nos eventos de 2024. Na xornada trataranse os asuntos que atinxen á administración da organización e presentaranse varios informes.
A Xunta vai solicitar de xeito inmediato ao Goberno central o traspaso dos medios materiais e persoais para xestionar a súa costa trala sentenza do Tribunal Constitucional que avala a Lei de ordenación e xestión integrada do litoral de Galicia. A conselleira de Medio Ambiente e Cambio Climático, Ángeles Vázquez, respondeu unha pregunta no pleno do Parlamento sobre esta materia na que salientou que o Alto Tribunal certifica que a norma galega é plenamente constitucional. Ademais, subliñou, confirma o que sempre defendeu a comunidade, que non é necesario reformar o Estatuto de Autonomía para que Galicia poida exercer plenamente as súas lexítimas competencias sobre o litoral.
