jueves, 18 de abril de 2024
A presentación desta nova edición tivo lugar hoxe no Pazo Provincial, acto no que participou o vicepresidente da Deputación de Ourense, Rosendo Fernández; o director de AGADIC, Jacobo Sutil; o alcalde do Carballiño, Francisco Fumega; a directora do FETEGA, Josi Lage; o representante da empresa Montañesa, Manuel Carballeda; e algúns dos actores e actrices presentes nesta edición do Festival.
A Deputación de Ourense colabora co FETEGA, "o festival de teatro máis antigo de Galicia e de referencia das artes escénicas galegas, que converte á Vila do Arenteiro na capital do teatro galego", dixo Rosendo Fernández, quen salientou a importancia da colaboración público e privada para poder desenvolver estas iniciativas que "dinamizan a actividade cultural do rural".
Neste mesmo sentido, o director de AGADIC destacou "o labor de difusión das artes escénicas" do FETEGA, que traerá ó Carballiño "unha boa representación do teatro galego", do 2 ao 6 de setembro. Así mesmo, Francisco Fumega asegurou que a celebración deste Festival significa para o municipio do Carballiño "compromiso coa cultura, implicación de moita xente e unha plataforma para actores do teatro galego".
Pola súa parte, Josi Lage expuxo as novidades do 30ª aniversario deste evento que pasará a chamarse Festival de Teatro Galego "Celso Parada", en homenaxe "a este actor e director vital das artes escénicas galegas, que nos deixou recentemente". Tamén destacou, entre as novidades deste ano, o incremento da programación a cinco días, o ciclo de monólogos, e o aumento das categorías dos premios que pasan a ser seis: Premio de Honra, Premio á mellor actriz, Premio ao mellor actor, Premio ao mellor espectáculo, Premio ao mellor espectáculo de rúa; e o Premio ao mellor monologuista cómico.
Programación
As obras de teatro que se celebrarán no Auditorio Municipal do Carballiño, ás 22.00 horas, comezarán o luns 2 de setembro coa obra "Anatomía dunha serea", da Compañía Iria Pinheiro -A Berbechería-Chévere; o martes 3 de setembro, será a quenda para a obra "Compañeira de piso", da compañía Contraproducións; o mércores 4 de setembro subirá ao escenario a companía Chévere coa obra "Curva España"; e ao día seguinte, o 5 de setembro, actuará a compañía Redrum Teatro coa obra "Idiota". O venres 6 de setembro, pecharán a programación do Festival a compañía Enconarte Producciones, coa obra "Monstruación". Será tamén nesa mesma xornada a Gala e entrega dos premios FETEGA "Dorotea Bárcena", conducida e presentada por Marían Bañobre.
O Anfiteatro será outro dos escenarios das actividades programadas para esta XXX edición do Festival, que darán comezo o luns 2 de setembro coa actuación "Catro 4'' segundos" (Novo Circo da Compañía ÍO; o 3 de setembro será a Compañía Dani García a que protagonice "Don Gelati" (Maxia Clown); o 4 de setembro tocaralle á compañía Excéntricas con "Cartoóns" (Comedia Clown); o 5 de setembro será a quenda para a compañía Asacocirco co espectáculo "Lume" (Circo Performático); e o venres 6 de setembro pechará as actuacións no Anfiteatro a compañía Sue Moreno co espectáculo "Sue Moreno 4.0" (Circo acrobático). Os espectáculos serán todos ás 19.00 horas.
Como actividades paralelas, haberá animación de rúa, un coloquio de creadoras baixo o título "Arte con nome de muller", obradoiros, monólogos cómicos e actividades infantís. O prezo das entradas para as funcións no Auditorio é de 5 euros, e para os monólogos é de 3 euros, mentres que o resto das actividades serán de balde.
A Secretaría de Estado de Turismo vén de emitir a resolución pola que se concede a declaración de Interese Turístico Nacional á Festa da Filloa de Lestedo, en Boqueixón. Con este recoñecemento, Galicia suma xa 10 festividades con este recoñecemento. A Festa da Filloa de Lestedo súmase así ás outras nove que xa contan con este recoñecemento: a Romaría de Nosa Señora da Barca (Muxía), as Carrilanas de Esteiro (Muros), as festas do San Froilán (Lugo), a Feira do Bonito (Burela), a Festa da Historia (Ribadavia), o Entroido de Verín. Tamén a Festa do Marisco do Grove, as Festas de San Roque (Vilagarcía de Arousa) e a Festa da Reconquista (Vigo).
Baixo o título 'Horizontes dos Estudos Galegos e /na Lusofonía', esta nova edición do congreso da AIEG parte do tradicional vínculo entre Galicia e os países lusófonos para promover o debate, a crítica e novas propostas sobre as relacións no espazo cultural, académico e institucional. Farao a través de relatorios, paneis, mesas e sesións plenarias nas que participarán especialistas das tres universidades galegas, pero tamén do ámbito nacional e internacional, que discutirán sobre os campos lingüístico, literario, histórico, económico, antropolóxico, filosófico, sociolóxico e artístico. No marco do congreso tamén terán cabida as actividades culturais, como excursións ou exposicións, especialmente dirixidas á mocidade investigadora; ou a presentación de produtos académicos e proxectos, como o Proxecto Nós, impulsado polo Goberno galego para incorporar a lingua propia de Galicia á vangarda da Intelixencia Artificial.
