viernes, 19 de abril de 2024
O presidente do Goberno galego, Alberto Núñez Feijóo, lembrou hoxe que Galicia é a comunidade máis solidaria de España, con máis de 7.700 voluntarios activos, un 35% máis que en 2016; dos cales seis de cada dez son mulleres e máis das tres cuartas partes son menores de 20 anos.
Durante a inauguración do XX Congreso Estatal de Voluntariado 2018, Feijóo destacou e agradeceu a vocación de servir aos demais e de poñer todo o voso empeño para facer unha Galicia e unha España mellor.
Conscientes de que a suma de accións benéficas, por pequenas que parezan por separado, é capaz de cambiar o mundo, o titular do Executivo autonómico referiuse ás iniciativas postas en marcha pola Xunta para fomentar o espírito voluntario desde moi novos, entre as que destacou: a publicación do libro Os Bolechas aprenden a ser persoas voluntarias, destinado a nenos de infantil e primaria; e a introdución no currículo de secundaria a materia de Voluntariado, que xa se imparte en dous centros educativos galegos o IES Castro Alobre de Vilagarcía de Arousa e o Colexio Divina Pastora de Ourense-, aos que esperamos que nos vindeiros cursos se sumen outros institutos.
Así mesmo, salientou que o voluntariado galego está a responder ás necesidades específicas da Comunidade a través, por exemplo, do programa de acompañamento a persoas maiores de 65 anos que viven soas; e do desenvolvemento dun programa de voluntariado para a prevención e a concienciación nas zonas máis afectadas pola lacra dos incendios forestais.
Feijóo concluíu subliñando que Galicia é, ademais, a única comunidade autónoma e a única rexión europea que certifica a acción voluntaria. E agradeceu o labor dos comités científico, técnico e de expertos deste congreso, integrado pola Plataforma do Voluntariado de España, as tres universidades galegas e entidades sociais.
O director xeral de Relacións Exteriores e coa UE, Jesús Gamallo, participou na sesión plenaria do Comité Europeo das Rexións (CdR), onde Galicia presentou 21 emendas a catro dos ditames sometidos a aprobación. Un dos máis relevantes para a comunidade foi o ditame sobre a ferramenta de facilitación transfronteiriza. Calcúlase que a eliminación do 20% das barreiras e obstáculos xurídicos e administrativos actuais entre rexións de fronteira na UE -entre as que se atopa Galicia, que conforma unha Eurorrexión xunto co Norte de Portugal- permitiría aumentar o seu PIB nun 2% e crear nelas ata un millón de empregos.
InnovArt 24, o maior evento en Galicia de promoción e difusión das ensinanzas artísticas, de idiomas e deportivas propicia o encontro entre as vocacións e os profesionais, e facilita que o alumnado de diferentes niveis educativos se familiaricen e tomen contacto cos eidos da arte dramática, as artes plásticas e deseño, a conservación e restauración de bens culturais, a danza, as ensinanzas deportivas, os idiomas e a música. A feira conta cunha zona de 4.100 m² no Museo Centro Gaiás, na que os visitantes poden participar en obradoiros de artes plásticas e deseño, traballos de conservación e restauración de bens culturais, actividades deportivas didácticas de música, arte dramática e danza, así como de idiomas. Tamén se ofrecen mostras e exhibicións das distintas ensinanzas, concertos, conferencias e espectáculos escénicos en directo.
