jueves, 25 de abril de 2024
O conselleiro de Economía, Emprego e Industria, Francisco Conde, mantivo esta mañá unha reunión coas empresas que están a colaborar no desenvolvemento do polo aeroespacial de Galicia para avaliar o avance deste proxecto no que se están a impulsar iniciativas que mobilizarán preto de 165 millóns de euros.
Tal e como explicou, o programa está no ecuador da súa execución coa participación de máis de 50 axentes entre administracións, socios tecnolóxicos e pemes que se foron incorporando neste tempo. Neste sentido, destacou que xunto co Instituto Nacional de Técnica Aeroespacial (INTA), os socios tecnolóxicos -Indra e Babcock-, e as pemes e centros tecnolóxicos, o proxecto vén de sumar a participación de Boeing, unha magnífica noticia para contar con empresas tractoras que permitan avanzar nos diferentes programas de innovación, destacou e informou que o polo aeroespacial xa leva mobilizado máis de 50M e superará os 400 postos de traballo.
Conde asegurou que o obxectivo é seguir traballando para pasar dos proxectos de innovación ao desenvolvemento industrial deste sector. Así, avanzou os proxectos que se van poñer en marcha nos vindeiros meses, como o parque industrial que se vai construír nas instalacións de Rozas, cun investimento de 2,4M prevé, nunha primeira fase, desenvolver 30.000m2 cunha dispoñibilidade inicial para a implantación de sete naves. Tamén se referiu á aceleradora aeronáutica de Lugo que botará a andar nas próximas semanas coa convocatoria da primeira das súas tres edicións previstas e nas que se espera mobilizar un mínimo de 4,75M dando soporte a 19 empresas e a creación de 60 empregos directos.
En canto ao Programa de Solucións, lembrou que están adxudicados nove dos 10 contratos licitados. En concreto, tres centrados no desenvolvemento de solucións para a xestión do territorio, tres para a mellora da competitividade do sector agrícola, dous para a seguridade e actividade da frota pesqueira e control e calidade das augas e un, liderado por Boeing, para a xestión do tráfico aéreo e a convivencia entre aeronaves tripuladas e non tripuladas.
Conde finalizou destacando a complementariedade das iniciativas que se están a realizar en Rozas e así explicou que, mentres os socios tecnolóxicos Indra e Babcock están a desenvolver en colaboración con pemes e centros tecnolóxicos catro plataformas (entre avións non tripulados e un dron mariño) e as súas aplicacións, proxectos como o que realizará Boeing será fundamental para permitir a súa convivencia con avións tripulados e avanzar no eido da seguridade e o control aéreo.
Hugo fala da relación do seu protagonista, un rapaz con trastorno do espectro autista, coa súa amiga Laia. Jimmy Núñez e María Roja interpretan este espectáculo, seleccionado para a primeira edición do circuíto estatal de artes escénicas para a infancia e a mocidade da ASSITEJ. Baixo o lema Voces dun mundo novo, o congreso reunirá compañías e profesionais de numerosos países arredor dunha programación artística, de relatorios e de intercambio, que este ano lles presta especial atención á participación, á amplitude de formas artísticas e á celebración do impacto comunitario. Para a configuración da carteleira de espectáculos tivéronse en conta especialmente propostas que traballan en espazos e formatos non tradicionais, inclusivas e sensoriais.
O Instituto Nacional de Estatística (INE), publicou hoxe os datos referidos aos establecementos hoteleiros no mes de marzo, nos que a Semana Santa contribuiu a que o sector hoteleiro galego consolidase a crecente mellora da súa rendibilidade. En concreto, segundo o INE, a rendibilidade hoteleira medrou en marzo un 15%. Con estas cifras estímase que o sector hoteleiro obtivo uns ingresos totais de 21,9 millóns de euros ese mes, cifra que supera nun 23% o dato de marzo do ano pasado, que non coincidiu coa Semana Santa, que fora en abril. Tamén medrou con respecto ao valor previo á pandemia, cando se facturaron preto de 16 millóns de euros. En canto ao número de viaxeiros, o segmento hoteleiro presentou un comportamento positivo en Galicia en marzo.
