miércoles, 24 de abril de 2024
O conselleiro de Facenda, Valeriano Martínez, explicou que o teito de gasto non financeiro para 2019 presentado no Parlamento galego é o máis san de todos os elaborados pola Xunta de Galicia, xa que é o que menos utiliza o recurso á débeda. De feito, nos últimos catro anos o límite de gasto pasou de ter unha porcentaxe de débeda sobre o total superior ao 5%, a representar o recurso ao endebedamento tan só o 0,7% o vindeiro ano.
O teito de gasto non financeiro para 2019 ascende a 9.850 millóns de euros, un 3,8% máis que no actual exercicio. Isto supón un incremento de 363 millóns sobre o presuposto en vigor ao mesmo tempo que descende o recurso á débeda, xa que a Comunidade Autónoma reducirá o seu déficit ata os 69 millóns de euros, o que supón o 0,1% do PIB.
Na súa intervención, o conselleiro de Facenda explicou que Galicia enlazará en 2019 cinco anos consecutivos de forte crecemento, nun exercicio no que seguirá baixando o paro, volverase reducir a ratio de débeda/PIB e se acadará a práctica consolidación fiscal. Tamén recalcou que, con este teito de gasto, a capacidade de gasto de Galicia nos últimos catro anos terá aumentado en 1.400 millóns de euros.
Valeriano Martínez incidiu en que este teito de gasto mantén a aposta por consolidar un modelo propio de crecemento en Galicia, en liña co marcado no Plan Estratéxico 2015-2020: Un crecemento san, apoiado no control do déficit e do endebedamento públicos, no investimento produtivo e no pago áxil dos nosos compromisos, sinalou.
Oito anos consecutivos con Teito de Gasto
Con este son xa oito anos consecutivos os que leva o Goberno galego presentando o límite de gasto para o vindeiro ano na Cámara, aínda que este ano non se puido aprobar nos prazos habituais. O conselleiro achacou esta situación ao Goberno central, que non comunicou unhas entregas a conta certas en xullo xa que faltaba un mes do Imposto do Valor Engadido (IVE)-, o que impediu a súa aprobación en prazo.
Non obstante, a Xunta preparou o teito de gasto para presentalo cando fose posible, co obxectivo de poder presentar en tempo e forma os orzamentos para 2019. Neste sentido, engadiu que o actual Goberno galego é solvente, responsable e cumpridor, e por iso se leva á Cámara o límite de gasto nun momento en que Galicia segue consolidando a recuperación económica e crecendo por riba de España, afirmou.
Máis crecemento
En canto á actualización do cadro macroeconómico, o conselleiro explicou que a previsión de evolución do PIB para 2018 do 2,8%, e do 2,5% para 2019, polo que Galicia seguirá medrando máis que a economía española. En termos de emprego, a previsión é rebaixar unha décima a taxa de paro recollida nos orzamentos vixentes, ao pasar do 14,2% ao 14,1%, mentres que en 2019 seguirá baixando ata o 12,7%.
En resumo, o conselleiro de Facenda afirmou que o teito de gasto presentado hoxe na Cámara autonómica é realista e prudente, dentro da consolidación dun modelo de crecemento propio en Galicia que facemos compatible coa consolidación fiscal e reducindo ao mínimo a dependencia da débeda.
Hugo fala da relación do seu protagonista, un rapaz con trastorno do espectro autista, coa súa amiga Laia. Jimmy Núñez e María Roja interpretan este espectáculo, seleccionado para a primeira edición do circuíto estatal de artes escénicas para a infancia e a mocidade da ASSITEJ. Baixo o lema Voces dun mundo novo, o congreso reunirá compañías e profesionais de numerosos países arredor dunha programación artística, de relatorios e de intercambio, que este ano lles presta especial atención á participación, á amplitude de formas artísticas e á celebración do impacto comunitario. Para a configuración da carteleira de espectáculos tivéronse en conta especialmente propostas que traballan en espazos e formatos non tradicionais, inclusivas e sensoriais.
O Instituto Nacional de Estatística (INE), publicou hoxe os datos referidos aos establecementos hoteleiros no mes de marzo, nos que a Semana Santa contribuiu a que o sector hoteleiro galego consolidase a crecente mellora da súa rendibilidade. En concreto, segundo o INE, a rendibilidade hoteleira medrou en marzo un 15%. Con estas cifras estímase que o sector hoteleiro obtivo uns ingresos totais de 21,9 millóns de euros ese mes, cifra que supera nun 23% o dato de marzo do ano pasado, que non coincidiu coa Semana Santa, que fora en abril. Tamén medrou con respecto ao valor previo á pandemia, cando se facturaron preto de 16 millóns de euros. En canto ao número de viaxeiros, o segmento hoteleiro presentou un comportamento positivo en Galicia en marzo.
