Galicia inicia o curso con 24.081 prazas públicas para nenos de 0 a 3 anos e con 5 novas escolas infantís en Lugo, Santiago, Ourense, A Estrada e Mos
O presidente do Goberno galego, Alberto Núñez Feijóo, destacou que a Comunidade galega inicia o curso con 24.081 prazas públicas para nenos de 0 a 3 anos, case 500 novas prazas máis que o ano anterior, e con cinco novas escolas infantís en Lugo, Santiago, Ourense, A Estrada e Mos. Durante unha visita ás instalacións da nova escola infantil da Fundación Amancio Ortega en Lugo, Feijóo aseverou que esta cifra a maior en número de prazas de escolas infantís da historia da comunidade- sitúa a ratio de cobertura en Galicia nun 41,6%, oito puntos por riba da ratio mínima aconsellada pola Unión Europea; unha cifra similar á provincia de Lugo que conta cunha oferta total de 2.653 prazas públicas.
O titular do Executivo autonómico recordou que a rede pública de escolas infantís é un dos piares nos que se asenta o Programa de apoio á natalidade. Unha iniciativa que se complementa coa posta en marcha doutras medidas como o Bono Concilia, que este curso conta con 3,4 millóns de euros ampliables para axudar ás familias que residan nun concello onde non existen centros sostidos con fondos públicos, así como a aquelas que non obtivesen praza nas escolas infantís de 0 a 3 anos da rede autonómica ou dependentes dos concellos, cumprindo así un ano máis o compromiso de que non haxa lista de espera para entrar nunha escola infantil.
Sobre este punto, salientou, ademais, que as mulleres vítimas de violencia de xénero terán prioridade no acceso a este bono e poderán presentar a solicitude fóra do prazo establecido.
Outras iniciativas
Cómpre destacar outras iniciativas como as casas niño, un servizo destinado aos núcleos rurais de Galicia que debido á súa escaseza de poboación carecen de servizo de atención continuada para os nenos de 0 a 3 anos. Un servizo que xa está a levar a cabo en 46 concellos, 40 pertencentes ás provincias de Lugo e de Ourense.
Así mesmo, referiuse ao Bono Coidado, para o coidado puntual dos menores de 12 anos no domicilio familiar cando circunstancias imprevistas impidan a súa realización ás persoas que normalmente desenvolven esta función; ou as escolas infantís en contornas empresariais, cunha en marcha desde o curso pasado en Narón e outras dúas que abrirán as súas portas no futuro en Mos e A Pobra do Caramiñal.
Feijóo lembrou tamén que o permiso por maternidade para as empregadas públicas aumentou de 20 a 22 semanas; que a Tarxeta Benvida se estendeu ata os tres anos para as familias con rendas baixas; e referiuse á futura posta en marcha dunha nova bonificación nas taxas das escolas infantís do 25% para o segundo fillo e do 50% para o terceiro e sucesivos.
O presidente da Xunta concluíu agradecendo á Fundación Amancio Ortega o seu compromiso cos máis cativos en colaboración coas administracións autonómica e locais. Non en van, grazas a esta nova infraestrutura, que pasará a formar parte da rede A Galiña Azul, a cidade de Lugo conta cunha oferta de 82 prazas públicas máis para nenos de 0 a 3 anos. En total, estamos a falar de 852 prazas públicas que sitúan a ratio de cobertura desta cidade no 34%, un punto por riba da ratio mínima aconsellada pola Unión Europea, concluíu.
R., 2018-09-18
Actualidad
Hugo fala da relación do seu protagonista, un rapaz con trastorno do espectro autista, coa súa amiga Laia. Jimmy Núñez e María Roja interpretan este espectáculo, seleccionado para a primeira edición do circuíto estatal de artes escénicas para a infancia e a mocidade da ASSITEJ. Baixo o lema Voces dun mundo novo, o congreso reunirá compañías e profesionais de numerosos países arredor dunha programación artística, de relatorios e de intercambio, que este ano lles presta especial atención á participación, á amplitude de formas artísticas e á celebración do impacto comunitario. Para a configuración da carteleira de espectáculos tivéronse en conta especialmente propostas que traballan en espazos e formatos non tradicionais, inclusivas e sensoriais.
O Instituto Nacional de Estatística (INE), publicou hoxe os datos referidos aos establecementos hoteleiros no mes de marzo, nos que a Semana Santa contribuiu a que o sector hoteleiro galego consolidase a crecente mellora da súa rendibilidade. En concreto, segundo o INE, a rendibilidade hoteleira medrou en marzo un 15%. Con estas cifras estímase que o sector hoteleiro obtivo uns ingresos totais de 21,9 millóns de euros ese mes, cifra que supera nun 23% o dato de marzo do ano pasado, que non coincidiu coa Semana Santa, que fora en abril. Tamén medrou con respecto ao valor previo á pandemia, cando se facturaron preto de 16 millóns de euros. En canto ao número de viaxeiros, o segmento hoteleiro presentou un comportamento positivo en Galicia en marzo.
Notas
Dos inicios do cinema galego á progresiva profesionalización do sector, pasando polo novos modelos de produción e pola situación das cineastas no momento actual. Trazar un percorrido histórico do panorama audiovisual galego ao longo das últimas tres décadas era o obxectivo central das xornadas que este xoves promoveu na Facultade de Comunicación a Asociación Galega de Produtoras Independentes (Agapi), con motivo do seu 30 aniversario.
A 22ª edición do Encontro Universitario de Danza da USC chega a Lugo este xoves 25 e o venres 26 coa presentación de producións de danza das compañías das universidades de Vigo, A Coruña e máis a propia da USC. As funcións, de entrada libre e de balde, serán ambos os dous días ás 20.30 horas na Caixa Negra do Museo Interactivo de Historia (MIHL). A compañía de danza da UDC abrirá este encontro o xoves 25, ás 20.30 horas, coa posta en escena de
E todo o demais non importa, unha coreografía colectiva con dirección artística de Alba Fdez. Cotelo.