Noticias

A ministra de Facenda afirma ante o presidente da Xunta que está buscando solucións para o asunto do IVE

A ministra de Facenda, María Jesús Montero, afirmou hoxe, ante o presidente da Xunta, que no relativo ao desaxuste producido polo cambio no sistema de liquidación do IVE e que supón para os galegos preto de 200 millóns de euros menos, está vendo como o pode arranxar. Durante unha reunión coa ministra, Alberto Núñez Feijóo solicitou unha solución con celeridade para unha situación que afecta, dixo, non só a Galicia senón ás demais comunidades.

“Unha solución para que o conxunto de comunidades poidamos presentar as nosas contas en setembro co 50% das 12 mensualidades do IVE que lexitimamente nos corresponde”, precisou, ao que engadiu que, de non resolverse, produciríase un enriquecemento inxusto por parte da Administración xeral e unha depreciación dos recursos das comunidades, garantidos no sistema de financiamento.

Logo de aseverar que a solución pasa por unha disposición en Cortes ou no Consello de Ministros, repoñendo o diñeiro que lle corresponde ás comunidades, Feijóo incidiu en que estas non poden asumir as consecuencias dunha decisión “unilateral” que o Goberno central tomou no seu momento e valorou a vontade da ministra de arranxar o problema: “Quedo con ese compromiso e coa convición de que así o fará”, dixo.

Así mesmo, o presidente da Xunta lembrou que a imposibilidade do actual Goberno para aprobar en Cortes a nova senda de estabilidade orzamentaria impide ao Executivo galego aprobar en tempo e forma o teito de gasto para 2019 en xullo e empezar a elaborar os orzamentos. E, en relación a este asunto, expresou o desexo de que esta situación non se alongue moito máis, “porque todos necesitamos ter unha senda de teito de gasto certa para poder elaborar un presuposto certo”.

Outra das materias que María Jesús Montero e Feijóo abordaron na xuntanza foi a relacionada coa débeda das comunidades. Ao respecto, o presidente do Executivo autonómico recordou o compromiso de Pedro Sánchez de que se compensará ás comunidades que, como Galicia, non recorreron ao FLA nin ao Plan de pago a provedores.

Feijóo agradeceu á ministra a confirmación de que este asunto estea na axenda do Goberno coa intención de, despois das vacacións, buscar a fórmula exacta para compensar, do mesmo xeito que se fixo en 2015, o que se entende tecnicamente como a condonación das liquidacións negativas, que para Galicia supoñen 85 millóns de euros ao ano.

Sobre o modelo de financiamento autonómico, o responsable do Goberno galego trasladou a preocupación por que a reforma do sistema poida quedar gardada nun caixón de forma indefinida. E insistiu en que o financiamento non pode ser moeda de cambio de ningunha reivindicación identitaria: “Non é para 17 comunidades senón para 48 millóns de españois, e baixo eses principios temos que falar”.

Feijóo valorou a intención do Goberno central de activar o grupo de traballo sobre a insuficiencia de recursos para, primeiro, concretar que é o que se necesita e cal é a insuficiencia obxectiva de recursos. E, respecto a Galicia recalcou o problema do avellentamento, con seis puntos porcentuais de maiores máis que a media de España, o que supón un custe sanitario maior.

Ao longo da reunión, Montero e Feijóo falaron tamén de Navantia e da construción das Fragatas F-110 da mariña española, cuxa orde de inicio se producirá a finais deste 2018, tal e como confirmou o presidente Pedro Sánchez; e da necesidade do apoio do Goberno central á organización do Xacobeo 2021.

Neste senso, e ademais dos dous sorteos da Lotería extraordinarios acordados co anterior goberno, o responsable do Executivo galego pediu que parte do 2% da recadación de Loterías da que pode dispoñer o Goberno central se oriente ao financiamento do vindeiro ano santo.

O presidente da Xunta incidiu en que a mellora da economía española ten que notarse nas contas públicas estatais e, tamén, nas das comunidades. E, nesta liña, recordou que Galicia é unha autonomía leal e responsable que contribúe a que a situación de España sexa cada vez mellor: desde a unidade e a vontade de cooperación e sen comprometer a estabilidade do país; sendo no mes de xullo, por exemplo, a comunidade onde máis baixou o paro; e cumprindo, exercicio tras exercicio, as súas obrigas.

“Somos unha autonomía responsable que contribuíu á mellora do noso país. Non tensionamos a facenda pública española; non solicitamos diñeiro para chegar a final de mes neste dez anos; e cumprimos todas as regras que o Consello de Política Fiscal e Financeira adoptou”, abundou, facendo fincapé en que Galicia cumpriu cos obxectivos de estabilidade; coa necesidade de controlar os niveis de débeda, e hoxe é a comunidade que menos se endebedou desde 2009; e cos pagos a provedores.

R., 2018-08-10

Actualidad

Foto del resto de noticias (campa_2018.jpg) Case 1500 rapaces e rapazas, de entre 9 e 17 anos, de estadía nos campamentos de verán da Xunta de Galicia, participaron ao longo dos meses de xullo e agosto na edición 2018 do programa de dinamización lingüística ‘O galego campa!’. Trátase dunha iniciativa que comparte un dos obxectivos prioritarios establecidos no Plan de dinamización da lingua galega na mocidade: a dinamización lingüística do galego no tempo de lecer da xente nova. As actividades chegaron, do 26 de xullo ao 13 de agosto, a un total de 15 campamentos incluídos na campaña.
Foto de la tercera plana (tremenda_jauria.jpg) O reguetón feminista e combativo das madrileñas Tremenda Jauría suporán este sábado, día 18, un divertido e comprometido alfinete festeiro para pechar o Atardecer no Gaiás de 2018. Precisamente, este ciclo de concertos do verán, ao aire libre e de balde caracterizouse nesta edición por contar cun especial peso das voces femininas —maioría entre as súas 21 actuacións— e concedeulle máis espazo as cada vez máis emerxentes músicas urbanas. Para este gran fin de festa, a banda despregará tamén o seu repertorio de merengue-punk ‒contan cunha atrevida versión neste rexistro de La línea del frente de Kortatu‒e electro-cumbia con ritmos tropicais e letras sociais.

Notas

A Consellería de Sanidade informa que elévase a oito, tras un novo ingreso rexistrado no Chuvi durante a pasada madrugada, as persoas ingresadas nos centros hospitalarios, logo do accidente ocurrido nun dos concertos do festival do Marisquiño. Catro dos feridos están no Hospital Álvaro Cunqueiro (un deles na UCI), tres no Hospital Povisa, e un no Complexo Hospitalario Universitario de Santiago.
O presidente da Asociación Provincial de Empresarios de Hostelería e Turismo de Lugo (Apehl), Cheché Real, anunciou esta mañá que a entidade vai participar de novo en La Vuelta a España, co posto de …E para comer, Lugo, da man de Turismo de Galicia. Na mesa da presentación oficial sentaron a conselleira do Medio Rural, Ángeles Vázquez; a directora de Turismo de Galicia, Nava Castro, e o director de La Vuelta, Javier Guillén.
ACTUALIDAD  
PORTALES  
SERVICIOS  
ENLACES  

RSS Válido

PUBLICIDAD
Deputación de Ourense
ACTUALIDAD GALICIADIGITAL
Blog de GaliciaDigital
PROMOCIÓN
PUBLICACIONES
Publicaciones
Publicaciones Amencer
Revista Egap
Obradoiro de Artesania