jueves, 25 de abril de 2024
Nota de prensa del Gabinete de Comunicación del Concello de Santiago de Compostela:
A décimo cuarta edición de Curtocircuíto dedicará unha retrospectiva ao director francés F.J Ossang, un artista underground, incapaz de limitar a súa creatividade a unha soa disciplina, cun estilo inconfundible que combina punk, situacionismo, film noir e ficción post-apocalíptica. Cineasta de actualidade, galardonado co premio á Mellor Dirección na pasada edición do Festival Internacional de Cine de Locarno, foi definido por Joe Strummer (The Clash) como "o único director co que volvería traballar sen dubidalo".
A retrospectiva dedicada ao director foi presentada na Casa do Concello nun acto no que participaron a concelleira de Acción Cultural, Branca Novoneyra; o director do festival Pela del Álamo, e o propio Ossang. A concelleira destacou do autor "a subversión creativa e o seu posicionamento político e artístico en diferentes expresións creativas". Novoneyra referiu que o espírito inconformista do director e a súa traxectoria encaixan perfectamente cun festival "afeito a facer da incomodidade virtude e a sorprendernos e retarnos en cada ocasión".
Pela del Álamo coincidiu na sintonía entre o traballo de Ossang co espírito "gamberro pero rigoroso" de Curtocircuíto, un festival, que como a traxectoria do autor, "toma como eixo o cinema para desenvolver ao seu redor unha proposta multicisciplinar cun estilo e imaxinario propios". Pola súa banda, o director francés manifestouse compracido de descubrir Galicia e destacou a calidade da proposta cultural de Santiago de Compostela e do festival, ao que colocou á altura doutros coma Clemont-Ferrand ou o Festival de Curtas de Vila do Conde.
Ás consultas sobre a distribución en salas do filme 9 Doigts, polo que foi premiado como Mellor Director no Festival de Locarno, F.J. Ossang explicou que será estreado en Francia o 7 de xaneiro e que axiña se poderá ver tamén en España.
Catro filmes de longa duración e cinco curtametraxes compoñen a retrospectiva que se ofrece ao público de Curtocircuíto en diferentes espazos da cidade. O Teatro Principal, a sala Numax e o Salón Teatro, darán acollida ás proxeccións que revisan a cinematografía do autor e dan conta dun cinema que se retroalimenta constantemente do seu traballo como músico, escritor, editor e poeta. Logo da primeira das proxeccións, programada esta tarde ás 20:15 horas no Teatro Principal, haberá un coloquio estendido entre o director e o público.
A Cidade da Cultura reunirá estes días as persoas representantes dunha vintena de linguas minoritarias de Europa. Será durante a asemblea xeral e a conferencia anual da Network to Promote Linguistic Diversity (NPLD), unha organización de ámbito europeo cuxa finalidade é promover a diversidade lingüística na UE. Entre os seus membros figura, desde a súa creación, a Xunta de Galicia, que, a través da Consellería de Cultura actúa como anfitrioa nos eventos de 2024. Na xornada trataranse os asuntos que atinxen á administración da organización e presentaranse varios informes.
A Xunta vai solicitar de xeito inmediato ao Goberno central o traspaso dos medios materiais e persoais para xestionar a súa costa trala sentenza do Tribunal Constitucional que avala a Lei de ordenación e xestión integrada do litoral de Galicia. A conselleira de Medio Ambiente e Cambio Climático, Ángeles Vázquez, respondeu unha pregunta no pleno do Parlamento sobre esta materia na que salientou que o Alto Tribunal certifica que a norma galega é plenamente constitucional. Ademais, subliñou, confirma o que sempre defendeu a comunidade, que non é necesario reformar o Estatuto de Autonomía para que Galicia poida exercer plenamente as súas lexítimas competencias sobre o litoral.
