viernes, 19 de abril de 2024
Nota de prensa del Gabinete de Comunicación del PSdeG:
A deputada socialista Noela Blanco criticou que a conselleira do Medio Rural teña perdido hoxe unha oportunidade excelente para reunirse cos representantes dos gandeiros e agricultores ourensáns afectados polas graves condicións climatolóxicas. Afeoulle que decidira pasar de largo amosando falla de diálogo e prepotencia co sector.
A responsable socialista considera escandalosa a actuación da conselleira e reclamoulle que deixe de disparar dialecticamente contra todos os que lle pedimos que faga o seu traballo. Sinalou que o que ten que facer é esforzarse menos en replicar e máis en responsabilizarse da situación e acordar un plan con medidas concretas de axuda aos agricultores e gandeiros que ven o seu modo de vida en perigo.
Noela Blanco vén de presentar unha serie de iniciativas nas que lle reclama ao goberno galego axudas para os viticultores e gandeiros ourensáns que este ano tiveron que soportar tanto a seca como as xeadas de abril e, o pasado 27 de agosto, a saraibada que danou gravemente aos cultivos.
Advirte de que as perdas dos viticultores poden superar os 14 millóns de euros, de acordo coas organizacións agrarias, nun ano no que en moitos casos non terán ningún ingreso e si un incremento dos gastos de entre o 10 e o 15 por cento para coidar a segunda brotación das vides. En calquera caso a situación esténdese ás producións de castaña, gandería de carne ou apicultura, tamén afectadas polas xeadas e a falla de chuvias.
Por iso reclámalle á Xunta que poña en marcha axudas directas para os viticultores que inclúan compensación polas perdas de produción previstas e que permitan a recuperación no seguinte ciclo produtivo. Solicita ademais liñas de crédito do Igape para que as explotacións gandeiras e vitícolas poidan facer fronte aos gastos, así como un plan urxente contra a seca consensuado coa Fegamp e organziacións ecoloxistas e agrarias.
Ademais, reivindica a intervención do Goberno central con bonificacións do 90 por cento das cotas á Seguridade Social por parte dos viticultores e gandeiros afectados, a redución dos módulos de Facenda para os sectores afectados e a declaración de zona catastrófica nos núcleos máis afectados.
Nota de prensa del Gabinete de Comunicación de la Xunta de Galicia:
A conselleira do Medio Rural, Ángeles Vázquez, reuniuse cos alcaldes dos concellos ourensáns de Cenlle, Gabriel Alén, e de Castrelo de Miño, Xurxo Rodríguez, para avaliar os danos rexistrados en ambos municipios pola treboada de sarabia do pasado día 27 de agosto.
Na xuntanza, na que tamén participou a directora xeral de Gandaría, Agricultura e Industrias Agroalimentarias, Belén do Campo, a conselleira explicou aos rexedores os resultados dos informes preliminares elaborados por técnicos de Medio Rural sobre a afectación do pedrazo nos cultivos de viñedo. Os estudos constataron que este fenómeno meteorolóxico adverso causou a rotura de ramas e follas, así como danos na pel das uvas e a caída de acios, que poden repercutir nunha diminución da cantidade de froito recollido, así como na redución da súa calidade. Estes danos centráronse en ambos concellos, polo que a consellería está realizando os estudos pertinentes para determinar se procede solicitar a declaración de zona de emerxencia.
En todo caso, tamén se constatou que en explotacións pequenas ou que teñan bodega propia os danos poden reducirse cunha rápida recollida e estrullado da uva. Por iso, por parte dos técnicos aconséllase acelerar a vendima, co fin de minimizar as consecuencias deste episodio adverso. Neste senso, a conselleira coincidiu cos alcaldes en que a uva que non se viu afectada ten unha excepcional calidade.
Ángeles Vázquez informou aos rexedores de que está previsto que o Consello da Xunta aprobe en breve unha liña de financiamento para os agricultores afectados por fenómenos adversos, dotada con 1,5 millóns de euros para as anualidade 2017/2018. A titular de Medio Rural explicou tamén que a Xunta solicitaralle ao Goberno central a realización de desgravacións no IRPF para os agricultores damnificados. Así mesmo, avanzoulles que se lles dará prioridade a ambos concellos nos criterios de reparto das diferentes axudas da consellería.
Por outra banda, a conselleira incidiu na importancia dos seguros agrarios como fórmula para facer fronte a este tipo de situacións e lembrou que Medio Rural destina este ano 4,7 millóns de euros a financiar a contratación de pólizas.
Fotografía: PSdeG.
O director xeral de Relacións Exteriores e coa UE, Jesús Gamallo, participou na sesión plenaria do Comité Europeo das Rexións (CdR), onde Galicia presentou 21 emendas a catro dos ditames sometidos a aprobación. Un dos máis relevantes para a comunidade foi o ditame sobre a ferramenta de facilitación transfronteiriza. Calcúlase que a eliminación do 20% das barreiras e obstáculos xurídicos e administrativos actuais entre rexións de fronteira na UE -entre as que se atopa Galicia, que conforma unha Eurorrexión xunto co Norte de Portugal- permitiría aumentar o seu PIB nun 2% e crear nelas ata un millón de empregos.
InnovArt 24, o maior evento en Galicia de promoción e difusión das ensinanzas artísticas, de idiomas e deportivas propicia o encontro entre as vocacións e os profesionais, e facilita que o alumnado de diferentes niveis educativos se familiaricen e tomen contacto cos eidos da arte dramática, as artes plásticas e deseño, a conservación e restauración de bens culturais, a danza, as ensinanzas deportivas, os idiomas e a música. A feira conta cunha zona de 4.100 m² no Museo Centro Gaiás, na que os visitantes poden participar en obradoiros de artes plásticas e deseño, traballos de conservación e restauración de bens culturais, actividades deportivas didácticas de música, arte dramática e danza, así como de idiomas. Tamén se ofrecen mostras e exhibicións das distintas ensinanzas, concertos, conferencias e espectáculos escénicos en directo.
