viernes, 19 de abril de 2024
Nota de prensa del Gabinete de Comunicación de la Xunta de Galicia:
O Salón Teatro de Santiago acolle un espectáculo especial no que música e pensamento se unirán para conmemorar o centenario da primeira visita de Federico García Lorca a Galicia. Con tal motivo, o guitarrista Samuel Diz presentará en directo o seu traballo discográfico Impresiones y paisajes, como el primer libro de Lorca, en diálogo co hispanista Ian Gibson, un dos maiores coñecedores da vida e obra do autor granadino.
Acompañaraos no escenario a locutora de Radio 3 Carolina Alba, xornalista compostelá radicada en Madrid, quen declamará unha escolma de textos xornalísticos e de fragmentos da obra lorquiana. A entrada será libre ata completar a capacidade do teatro.
A proposta, producida por Poliédrica co apoio da Xunta a través da Secretaría Xeral de Cultura, busca afondar na vinculación do poeta con Galicia, introducindo o público na personalidade creativa de Federico García Lorca nun plano moito menos coñecido: a súa relación coa música e e co universo musical da Xeración do 27.
O xermolo deste espectáculo conmemorativo atópase nas impresións que o autor anotou no seu caderno durante o seu periplo formativo por Galicia nunha viaxe organizada polo seu profesor Martín Domínguez Berrueta para que os seus alumnos coñecesen o patrimonio do norte de España e que despois se publicaron no que foi o primeiro libro do poeta, Impresiones y paisajes. Este título dálle nome ao disco no que Samuel Diz recupera a música dalgúns dos principais protagonistas da Xeración do 27.
Esa viaxe de estudos en 1916 foi para Lorca unha descuberta inicial da paisaxe de Galicia e da obra de Rosalía de Castro, á que despois seguiría a construción dunha fonda amizade con escritores e intelectuais galegos como Blanco Amor, Dieste ou Guerra da Cal, e músicos como Bal y Gay. Esta vinculación afectiva trasladaríase tamén ao plano creativo, coa incursión do escritor na nosa lingua a través dos Seis poemas galegos.
Fotografía: Gabinete de Comunicación de la Xunta de Galicia
O director xeral de Relacións Exteriores e coa UE, Jesús Gamallo, participou na sesión plenaria do Comité Europeo das Rexións (CdR), onde Galicia presentou 21 emendas a catro dos ditames sometidos a aprobación. Un dos máis relevantes para a comunidade foi o ditame sobre a ferramenta de facilitación transfronteiriza. Calcúlase que a eliminación do 20% das barreiras e obstáculos xurídicos e administrativos actuais entre rexións de fronteira na UE -entre as que se atopa Galicia, que conforma unha Eurorrexión xunto co Norte de Portugal- permitiría aumentar o seu PIB nun 2% e crear nelas ata un millón de empregos.
InnovArt 24, o maior evento en Galicia de promoción e difusión das ensinanzas artísticas, de idiomas e deportivas propicia o encontro entre as vocacións e os profesionais, e facilita que o alumnado de diferentes niveis educativos se familiaricen e tomen contacto cos eidos da arte dramática, as artes plásticas e deseño, a conservación e restauración de bens culturais, a danza, as ensinanzas deportivas, os idiomas e a música. A feira conta cunha zona de 4.100 m² no Museo Centro Gaiás, na que os visitantes poden participar en obradoiros de artes plásticas e deseño, traballos de conservación e restauración de bens culturais, actividades deportivas didácticas de música, arte dramática e danza, así como de idiomas. Tamén se ofrecen mostras e exhibicións das distintas ensinanzas, concertos, conferencias e espectáculos escénicos en directo.
