viernes, 19 de abril de 2024
Nota de prensa del Gabinete de Comunicación de la Xunta de Galicia:
O secretario xeral de Cultura, Anxo Lorenzo, participou na clausura da exposición 'Compañías convenientes. Diálogos contemporáneos co home poliedro', que se exhibiu na Fundación Pública Galega Camilo José Cela desde o mes de maio.
A arte contemporánea foi o eixo central deste proxecto expositivo no que Román Corbato, Elena Fernández Prada, Mery Pais, Amaya González Reyes, Chelo Matesanz, Carme Nogueira, Jorge Perianes, Laura Piñeiro, David Catá, Edu Valiña, Jesús Madriñán e Paulova interaccionaron con obras literarias, obxectos e espazos da fundación para propoñer un achegamento creativo á figura e ao legado literario do escritor padronés.
Os 12 artistas, afirmou Anxo Lorenzo, "abriron para nós o diálogo para achegarnos ás diversas facetas da figura de Cela, con atrevemento, con orixinalidade, con calidade creativa e cunha frescura que nos convida a lecturas novas".
A iniciativa, comisariada por Paula Cabaleiro, enmárcase na programación promovida pola Xunta de Galicia para conmemorar o centenario do nacemento do premio Nobel galego, con diversas actividades na sede da fundación e fóra dela para poñer a Cela no centro da actualidade cultural.
O director xeral de Relacións Exteriores e coa UE, Jesús Gamallo, participou na sesión plenaria do Comité Europeo das Rexións (CdR), onde Galicia presentou 21 emendas a catro dos ditames sometidos a aprobación. Un dos máis relevantes para a comunidade foi o ditame sobre a ferramenta de facilitación transfronteiriza. Calcúlase que a eliminación do 20% das barreiras e obstáculos xurídicos e administrativos actuais entre rexións de fronteira na UE -entre as que se atopa Galicia, que conforma unha Eurorrexión xunto co Norte de Portugal- permitiría aumentar o seu PIB nun 2% e crear nelas ata un millón de empregos.
InnovArt 24, o maior evento en Galicia de promoción e difusión das ensinanzas artísticas, de idiomas e deportivas propicia o encontro entre as vocacións e os profesionais, e facilita que o alumnado de diferentes niveis educativos se familiaricen e tomen contacto cos eidos da arte dramática, as artes plásticas e deseño, a conservación e restauración de bens culturais, a danza, as ensinanzas deportivas, os idiomas e a música. A feira conta cunha zona de 4.100 m² no Museo Centro Gaiás, na que os visitantes poden participar en obradoiros de artes plásticas e deseño, traballos de conservación e restauración de bens culturais, actividades deportivas didácticas de música, arte dramática e danza, así como de idiomas. Tamén se ofrecen mostras e exhibicións das distintas ensinanzas, concertos, conferencias e espectáculos escénicos en directo.
