viernes, 19 de abril de 2024
Nota de prensa del Gabinete de Comunicación de la Xunta de Galicia:
O Centro Galego de Artes da Imaxe (CGAI-Filmoteca de Galicia) da Consellería de Cultura, Educación e Ordenación Universitaria recibe o xoves 31 de marzo, na súa sede da Coruña, o cineasta José Luis Guerin para participar nun encontro co público con motivo da proxección de La academia de las musas, o seu último filme.
Guerin quen imparte unha clase maxistral sobre a relación entre cinema e fotografía no Museo de Arte Contemporánea (MAC) Gas Natural Fenosa, para a que xa se esgotaron as prazas dispoñibles presentaralle aos espectadores a fita que estreou na pasada edición do Festival de Cine de Locarno e pola que obtivo o Giraldillo de Oro á mellor película no Festival de Cine Europeo de Sevilla. A sesión do xoves 31 de marzo, programada para as 20.30 horas, será de entrada libre ata completar a capacidade da sala.
A medio camiño entre o documental e a ficción, o filme de Guerin conta a historia do controvertido proxecto dun profesor de Filoloxía que, a través dunha academia das musas inspirada en referencias clásicas, pretende rexenerar o mundo mediante a poesía e que acabará desencadeando unha serie de situacións dominadas pola linguaxe e polo desexo.
Nova sesión o venres
La academia de las musas volverá proxectarse no CGAI o venres 1 de abril, ás 18.00 horas, como inicio dun programa dobre que inclúe, así mesmo, outros dous títulos asinados recentemente polo realizador catalán. En primeiro lugar, Le Saphir de Saint-Louis, un documental de produción francesa sobre un tesouro que agocha a catedral de Sain-Louis de La Rochelle: unha pintura sobre a traxedia en 1741 da goleta Saphir durante unha das súas travesías de tráfico de escravos. Exhibirase tamén Correspondencias, que narra a relación persoal entre o propio Guerin e o cineasta lituano Jonas Mekas a través de nove cartas, filmadas nos lugares máis variados do mundo.
A Filmoteca de Galicia volve deterse, así, na que é unha das figuras imprescindibles para entender a evolución do documental e do chamado cinema de autor en España. José Luis Guerin, quen hai cinco anos xa visitara o CGAI para impartir unha clase maxistral, conta cunha ampla traxectoria á marxe dos ditados do cinema comercial e na que atopamos títulos tan sobresaíntes como Innisfree (1990), En la ciudad de Sylvia (2007), Guest (2010) ou En construcción (2001), o proxecto co que obtivo unha maior repercusión tanto por parte do público como da crítica.
A súa filmografía destaca por un carácter esencialmente visual, unha linguaxe reflexiva e poética e un estilo sinxelo que, ao tempo, establece habituais diálogos con outras artes, como a pintura ou a fotografía. De feito, varios dos seus traballos teñen transcendido da gran pantalla a espazos artísticos como o Centro Pompidou de París, o Centro de Cultura Contemporánea de Barcelona ou a Bienal de Venecia.
O director xeral de Relacións Exteriores e coa UE, Jesús Gamallo, participou na sesión plenaria do Comité Europeo das Rexións (CdR), onde Galicia presentou 21 emendas a catro dos ditames sometidos a aprobación. Un dos máis relevantes para a comunidade foi o ditame sobre a ferramenta de facilitación transfronteiriza. Calcúlase que a eliminación do 20% das barreiras e obstáculos xurídicos e administrativos actuais entre rexións de fronteira na UE -entre as que se atopa Galicia, que conforma unha Eurorrexión xunto co Norte de Portugal- permitiría aumentar o seu PIB nun 2% e crear nelas ata un millón de empregos.
InnovArt 24, o maior evento en Galicia de promoción e difusión das ensinanzas artísticas, de idiomas e deportivas propicia o encontro entre as vocacións e os profesionais, e facilita que o alumnado de diferentes niveis educativos se familiaricen e tomen contacto cos eidos da arte dramática, as artes plásticas e deseño, a conservación e restauración de bens culturais, a danza, as ensinanzas deportivas, os idiomas e a música. A feira conta cunha zona de 4.100 m² no Museo Centro Gaiás, na que os visitantes poden participar en obradoiros de artes plásticas e deseño, traballos de conservación e restauración de bens culturais, actividades deportivas didácticas de música, arte dramática e danza, así como de idiomas. Tamén se ofrecen mostras e exhibicións das distintas ensinanzas, concertos, conferencias e espectáculos escénicos en directo.
