martes, 23 de abril de 2024
A Consellería de Cultura, Educación e Ordenación Universitaria programa o venres 11 e o sábado día 12 de abril dúas funcións de As Orações de Mansata, o espectáculo multicultural producido polo colectivo Cena Lusófona no que participan tres compañías lusas e 13 actores e actrices de seis países de lingua oficial portuguesa.
O Centro Dramático Galego (CDG) adheriuse en 2012 a esta iniciativa levada a cabo a través do proxecto europeo P-STAGE (Portuguese-Speaking Theatre Actors Gather Energies), liderado pola Escola da Noite de Coimbra e a Companhia de Teatro de Braga, ademais do Teatro Vila Velha brasileiro; e no que tamén participan Elinga Teatro de Angola, Acçao para o Desenvolvimento de Guinea Bissaue e Centro de Intercambio Teatral de Sao Tomé e Príncipe. O programa, que comezou coa realización de tres obradoiros de interpretación nos países membros, incluía a montaxe dun espectáculo internacional e a súa exhibición e posta en circulación por todos os territorios adheridos.
As Orações de Mansata é o espectáculo resultado de todo este proceso, que recala os próximos días no Salón Teatro de Santiago despois da súa estrea en outubro do ano pasado en Coimbra e do seu paso por Braga, Évora, Campo Benfeito e Salvador de Baía. Para o próximo mes de maio ten previstas as últimas escenificacións en Luanda e en Guinea Bissau.
Primeiro texto teatral publicado
O texto, baseado na traxedia Macbeth de William Shakespeare, xurdiu da proposta lanzada polo director de escena luso Antonio Augusto Barros ao autor guineano Abdulai Sila. A súa publicación en 2007 constituíu a primeira edición dunha peza teatral levada a cabo en Bissau.
O argumento conta a situación que se desenvolve cando oito conselleiros do Xefe Supremo disputan entre eles a mellor forma de derrocar ao líder e ocupar a cadeira da Suprematura. Para conseguilo, parten en busca das Oraçoes de Mansata, que supostamente lles facilitaran o dominio sobre o seu pobo, nun proceso no que a traizón, a tortura e o asasinato son reducidas á banalidade.
António Augusto Barros dirixe os 13 intérpretes do espectáculo, seleccionados nos obradoiros realizados dentro do P-STAGE sobre nocións de dramaturxia, dirección, escenografía, iluminación e figurinos. O grupo compón un elenco multicultural e diverso, integrado por tres angolanos, dous guineanos, e dous de Santo Tomé e Principe, tres portugueses un mozambicano e dous brasileiros.
O director e dramaturgo galego Cándido Pazó fora o encargado de impartir un dos obradoiros de interpretación que, baixo o título Da oralidade á teatralidade se celebrou en Guinea Bissau en abril de 2013.
Venda de entradas
As entradas para as dúas funcións de As Orações de Mansata están xa á venda na billeteira do Teatro Principal de Santiago, aberta ao público de 18.00 a 21.00 horas, mentres que na do propio Salón Teatro poderán mercarse os días do espectáculo desde as 18.30 horas. O seu prezo é de 10 euros, con descontos do 40% para estudantes, xubilados, desempregados, usuarios do carné xoven e determinados colectivos profesionais.
Ademais, esta é unha das propostas da programación inserida no Bono de Teatro Galego e Portugués, promovido conxuntamente pola Axencia Galega das Industrias Culturais (Agadic) e o Concello de Santiago para impulsar a oferta teatral galega de 2014 no Salón Teatro e no Teatro Principal, xunto coas propostas máis alternativas que acollen a Zona C e a Sala Agustín Magán. O prezo deste bono, que pode adquirirse nos devanditos despachos de billetes, é de 35 euros para un total de 5 funcións.
Por que o universo dos activos dixitais semella un mundo masculino? Por que a maioría de influencers do mundo cripto que saen á palestra son homes? Está equilibrada a proporción entre homes e mulleres nos consellos de administración das empresas? Estas son algunhas das preguntas ás que se deu resposta este luns na VI Xornada de igualdade de xénero e Dereito Mercantil, actividade dirixida desde a Facultade de Ciencias Xurídicas e do Traballo polas docentes Sara Louredo e Ana Mª Aido e para a que, nesta ocasión, se contou coa participación de dúas profesoras expertas en Dereito Mercantil: Vanessa Jiménez, da Universidad de Salamanca, e Josefina Boquera, da Universidad de Valencia.
Un total de 23 os equipos de 19 colexios e institutos participaron no lanzamento de satélites elaborados por parte de centros educativos galegos no marco da fase autonómica do programa da Axencia Espacial Europea Cansat 2024, que se desenvolveu no aeródromo das Gaivotas, en Cerceda. A xornada desenvolveuse arredor de tres actividades: un obradoiro de foguetes químicos e de auga impartida polo alumnado do Centro Público Integrado O Cruce (Cerceda), unha exhibición de drons a cargo de Aeromedia e o lanzamento dos satélites. O secretario xeral técnico da Consellería de Educación, Ciencia, Universidades e FP, Manuel Vila, acompañou os alumnos nesta xornada.
