Notas de prensa

O 49º FITCE reúne en Compostela a 500 profesionais das telecomunicacións da Unión Europea (UE)

O Goberno galego, a través das iniciativas previstas na 2014.gal Axenda Dixital de Galicia, está a traballar “para crear emprego e riqueza, construír unha administración máis eficiente e cercana, capacitar aos cidadáns para o mercado global e dotar á Comunidade de infraestruturas de telecomunicacións modernas e sostibles”. Así o destacou a secretaria xeral de Modernización e Innovación Tecnolóxica, Mar Pereira, durante e a inauguración da 49 edición do Congreso FITCE, o simposio europeo das TIC que se celebra en Santiago de Compostela ata o 4 de setembro baixo o lema “O Camiño de Santiago e as Telecomunicacións europeas”.

A responsable do departamento autonómico indicou que os compromisos recollidos na Axenda Dixital de Galicia son “ambiciosos pero alcanzables” e con eles a Xunta demostra o seu interese e o esforzo en “aproveitar as oportunidades que trae consigo a nova era dixital e asume o reto de converxer con Europa no 2020”.

Liñas de actuación de 2014.gal

Mar Pereira lembrou que 2014.gal é a estratexia global da Xunta de Galicia en materia tecnolóxica e “establece a folla de ruta para acadar un crecemento sostible e converxer con Europa no 2020”. Entre os obxectivos establecidos na Axenda Dixital está a promoción e a creación, no ámbito da economía do coñecemento, e máis de 12.000 empregos ata 2014, pasando do 1,6% ao 2,5% da poboación ocupada. Ademais, potenciarase a transformación do sector da economía do coñecemento para aumentar a súa actividade económica en 800 millóns de euros máis para o 2014, pasando do 4,8% ao 6% do PIB.

A Axenda Dixital de Galicia permitirá modernizar a Administración para facela máis eficiente e próxima á sociedade, facendo realidade unha verdadeira relación telemática cos cidadáns. Neste sentido, a secretaria xeral indicou que “o obxectivo é que en 2014 todos os expedientes administrativos poidan ser tramitados por Internet e que o 100% dos funcionarios públicos teñan competencias dixitais para conseguir unha verdadeira Administración electrónica”.

A capacitación dixital da sociedade é outra das liñas de actuación previstas na Axenda Dixital contemplando medidas para reducir drasticamente a fenda dixital co obxectivo “irrenunciable de converxer coa Unión Europea nos indicadores esenciais de emprego das TIC en fogares, pemes e autónomos”.

O elemento imprescindible para acadar estes obxectivos é, segundo destacou Mar Pereira, poder contar con infraestruturas de telecomunicacións modernas e sostibles, un obxectivo no que se está a traballar a través do Plan de Banda Larga de Galicia. Así, o 100% da poboación poderá contar con banda larga de polo menos 2 Mbps e un millón de galegos terán acceso a redes de nova xeración con velocidades de 100 Mbps en 2013.

Converxer con Europa

A responsable de Innovación Tecnolóxica da Xunta, destacou que a creación desta Axenda, plenamente aliñada coa Axenda Dixital Europea, “pon de manifesto que malia que o Camiño de Santiago constitúe o primeiro nexo de unión entre Galicia e Europa, os seus vínculos non se limitan a esta ruta de peregrinación. A través das súas correspondentes Axendas Dixitais, as dúas asumen o compromiso de lograr un crecemento intelixente, sustentable e integrador que permita obter altos niveis de emprego, de produtividade e de cohesión social. “

49 edición FITCE

Nesta nova edición de FITCE, organizada pola Asociación de Enxeñeiros de Telecomunicación de Galicia (AETG), co respaldo da Asociación Española de Ingenieros de Telecomunicación (AEIT), debaterase sobre o estado e os proxectos de futuro das infraestruturas de telecomunicacións na Unión Europea baixo o lema “O camiño de Santiago e as telecomunicacións europeas”.

Un total de 500 profesionais das telecomunicacións de toda Europa participarán ata o vindeiro día 4 neste simposio internacional no que se desenvolverán once presentacións orais, catro sesións de posters e dúas mesas redondas (integradas polos principais fabricantes e operadores de telecomunicacións do país).

Os relatores analizarán o campo dos servizos e aplicacións TIC, afondando na nova era tecnolóxica e nas aplicacións avanzadas que permitirán acceder a infraestruturas intelixentes. Así mesmo, abordarán a aplicación da fórmula I+D á configuración de Internet, á vez que exporán os retos aos que se enfrontarán os reguladores das telecomunicacións ao vivir inmersos na sociedade da información.

Compartir Tweet Menéame