Notas de prensa

A Xunta pide reforzar a negociación dos produtores do leite durante a presidencia española da UE

O conselleiro do Medio Rural da Xunta de Galicia, Samuel Juárez, enviou unha carta á ministra de Medio Ambiente y Medio Rural y Marino, Elena Espinosa, na que solicita que España aproveite a Presidencia rotatoria da Unión Europea para imprimir celeridade na resolución dalgúns aspectos urxentes ligados ao sector lácteo.

En concreto, o conselleiro pide á ministra que se reforcen “os sistemas de sostemento de prezos”, e se aborde “con propostas máis ambiciosas o problema da escasa capacidade de negociación dos agricultores no contexto das normas de competencia”, un asunto que, lembra Juárez na misiva, xa estivo presente na recente entrevista entre as organizacións de produtores agrarios e o presidente do Goberno de España, José Luis Rodríguez Zapatero.

Neste senso, o conselleiro do Medio Rural considera que “a excesiva lentitude nas tarefas que se desenvolven polo grupo de traballo de alto nivel” [creado ad hoc pola Unión Europea] leva á ausencia de propostas concretas que xa son urxentes para este sector fundamental na economía galega.

Voo cancelado

Na carta, o titular do Medio Rural desculpa a súa ausencia no Consejo Consultivo de Agricultura [xuntanza dos responsables autonómicos e nacionais na materia] que tiña lugar no Ministerio, inasistencia debida á cancelación do voo que tiña que levalo a Madrid. É por este motivo polo que Juárez envía a carta a Espinosa, coa intención de que a postura galega fique expresamente reflectida nos documentos e foros que o Ministerio estableza a partir de agora para fixar a posición española sobre a Política Agraria Común máis aló de 2013.