Notas de prensa

Ferrol presenta o seu primeiro Plan de Emerxencia ante catástrofes

O alcalde, Vicente Irisarri, e a concelleira de Seguridade e Protección Civil, Sandra Ríos, presentaron o primeiro Plan de Emerxencia Municipal (PEMU) do Concello de Ferrol, que foi dictaminado favorablemente, e por unanimidade, na Xunta Local de Protección Civil. Dito plan enmárcase dentro da aposta feita polo Goberno municipal pola prevención, unha aposta que se iniciou coa creación do Servizo Municipal de Prevención no Corpo de Bombeiros e coa elaboración de plans de emerxencia e prevención en edificios e instalacións públicas da cidade, entre outras actuacións.

Con este Plan, que se estivo elaborando desde finais de 2008 a través da empresa Belt Ibérica coa supervisión do propio Concello, a Administración local dispón dunha ferramenta que lle permitirá respostar de xeito eficaz ante calquera eventualidade que se produza no Concello, pois contempla escenarios de nevadas, seísmos, inundacións ou sequías, entre outras posibles. Trátase dun documento que senta as bases para a organización do Concello ante unha gran emerxencia como ciclóns ou incendios forestais e é un documento vivo no que se ten que seguir traballando a diario a través do contacto directo con empresas privadas, outras administracións públicas ou entidades colaboradoras. Legalmente se ten que actualizar cada catro anos, se ben hai que revisalo permanentemente e, para a súa elaboración, estableceuse un prazo de sete meses mentres que para a segunda, a correspondente á súa implantación, de dous.

O PEMU recolle as características xerais do territorio do municipio, xunto coa súa cartografía e o estudo do sistema de asentamento poboacional, e conta coa delimitación das vías de comunicación do municipio e a súa titularidade. Atende así mesmo a aspectos como as características xeográficas e demográficas do territorio, a hidroxeoloxía e meteoroloxía, as instalacións industriais, a rede de abastecemento e saneamento e o patrimonio histórico e natural. A estes aspectos únense a identificación, análise e ponderación dos riscos en cada unha das zonas que foron analizadas previamente. Ditos riscos, os potencialmente previsibles, están numerados, tales como as inundacións, nevadas, xeadas, néboas, ventos, tormentas, derrubos, sismos ou incendios e está plasmada a localización xeográfica de cada un deles coas posibles consecuencias que pode ter.

Neste apartado, o PEMU recolle como riscos de nivel alto os incendios forestais, os temporais e os incendios urbanos. Riscos de nivel medios son a contaminación, saturación da rede de sumidoiros, transporte por estrada e ferrocarril, inundacións, incendios industriais e industrias perigosas, transporte de mercancías perigosas, colapso de infraestruturas, fallo nos servizos públicos esenciais ou concentracións humanas. Finalmente, como riscos de nivel baixo contémplanse a sequía, afundimentos de terreos, rotura de depósitos, actividades deportivas e recreativas, riscos sanitarios, néboas, nevadas, xeadas e sismos.

Outro dos apartados do Plan de Emerxencia Municipal fai referencia ás medidas preventivas para reducir ou evitar as posibilidades de que se produzan continxencias, como son os procedementos, actuacións e medios necesarios para atenuar as consecuencias que puideran ter na poboación, grupos de accións, bens material ou no medio ambiente. Xunto a estes Plans de Actuación Municipal (PAM), o PEMU dispón de guías de respostas e dunha ferramenta informática e dun GIS (Sistema de Información Geográfica).

A dirección do PEMU corresponde ao alcalde de Ferrol e dela depende, para a súa aplicación, o Centro de Coordinación Operativo Municipal (Cecopal), cuxa ubicación propúxose na primeira planta do Cuartel de San Xoán e ten como responsable á edil de Seguridade Cidadá; o Comité Asesor (primeira teniente de alcalde) e a Dirección Técnica Posto de Mando Avanzado (coordinador de Seguridade do Concello). O organigrama organizativo complétase cos grupos de acción Sanitario (director da área territorial do Servizo Galego de Saúde), de Seguridade (Xefe da Policía Local), Intervención (Xefe de Bombeiros), Transmisións (Ofical da Policía Local da área de Seguridade de Edificios), Loxístico (Inspector de Policía Local, Unidade Supra-Territorial) e Rehabilitación de Servizos Públicos (Inxeñeiro municipal). Finalmente, como subgrupos establécense os de Asistencia Social, Transporte, Recursos e Compras.

O Plan de Emerxencia Municipal deberá agora ser dictaminado a favor na Comisión de Seguridade e ser aprobado en pleno para posteriormente remitirse á Xunta de Galicia (á Dirección Xeral de Protección Civil) para a súa homologación. O primeiro paso foi presentalo na Xunta Local de Protección Civil, acto que tivo lugar onte, cuxos membros dictaminárono a favor. Estes son: o alcalde, o secretario (xefe do Negociado de Seguridade), o xefe de Bombeiros, o xefe da Policía Local, o comisario do Corpo Nacional de Policía de Ferrol-Narón, o capitán da Garda Civil, os edís de Seguridade e Tráfico, a primeira tenente de alcalde, un representante de Cruz Vermella, o xefe da Agrupación de Voluntarios de Protección Civil, dous representantes de Navantia, un representante da Armada en Ferrol, un representante da Xunta de Galicia e outro do Servizo Galego de Saúde.