Notas de prensa

Pesca solta 1.350 alevíns de lumbrigante en Lira

Técnicos do Instituto Galego de Formación en Acuicultura (Igafa), dependente da Consellería de Pesca e Asuntos Marítimos, realizaron a solta de 1.350 alevíns de lumbrigante na costa de Lira, no concello coruñés de Carnota. Os exemplares, cunha talla media de sete centímetros e de entre oito e nove meses de vida, foron liberados ao sur da Reserva Mariña de Interese Pesqueiro “Os Miñarzos”, concretamente nas proximidades da praia de Simpron.

Esta acción, enmarcada no Plan de Repoboación de Especies Mariñas no Litoral Galego, posto en marcha pola Administración pesqueira galega en 2005, constitúe a segunda solta de xuvenís de lumbrigante realizada en 2008 e permite elevar a preto de 9.000 as unidades desta especie introducidas no litoral da nosa comunidade. Ademais, hai que lembrar que en toda a costa galega xa foron soltados 25.000 exemplares de rodaballo.

Para levar a cabo o cultivo destes lumbrigantes, recóllense no medio natural femias ovadas que se mesturan con outras que son fecundadas nas propias instalacións do Igafa. As larvas naceron, neste caso, entre os meses de decembro de 2007 e xaneiro deste ano e o seu preengorde realizouse en batea ata que acadaron a talla ideal para a súa solta no mar.

Posteriormente, os exemplares son marcados cunha etiqueta magnética e codificada dun milímetro de tamaño, que se introduce no seu interior e que dá un sinal positivo ao seu paso por un detector de metais. Unha vez marcados, os lumbrigantes xa están preparados para poder ser soltados.

Os técnicos do Igafa encargaranse agora de facer un seguimento exhaustivo dos alevíns liberados no medio natural mediante a realización de mostraxes periódicas, aínda que haberá que agardar un par de anos para ter resultados definitivos do proxecto. Non entanto, calcúlase que hai exemplares soltados anteriormente que en breve poderían comezar a quedar retidos nas nasas, polo que técnicos do Igafa están informando ao sector para que presten a súa colaboración en caso de capturar algún destes individuos.

A esta solta seguirá outra ao longo do actual exercicio, de forma que para 2008 está previsto liberar un total de 5.000 exemplares de lumbrigante en tres quendas. Esto permitirá acadar a cifra de 11.000 alevíns desta especie introducidos na costa galega.

Accións de repoboación dende 2005

Coa actuación desenvolvida hoxe en Lira, a Consellería de Pesca dá un paso máis na aplicación do Plan de Repoboación de Especies Mariñas no Litoral Galego, posto en marcha en outubro de 2005, e co que se introduciron ata o momento no medio natural un total de 25.000 exemplares de rodaballo, así como 9.000 xuvenís de lumbrigante.

Con esta acción estratéxica, o departamento que dirixe Carmen Gallego quere xestionar e mellorar a situación de certas pesqueiras que sufriron nos últimos anos un descenso importante no seu número de capturas. Así, coas soltas previstas para este ano, ademais dos 11.000 xuvenís de lumbrigante preténdese acadar os 34.000 exemplares de rodaballo.

A primeira experiencia deste tipo levouse a cabo en outubro de 2005 na praia de Lago (Muxía) coa solta de 10.000 alevíns de rodaballo. A esta solta seguiron outras máis realizadas ao longo de 2006, 2007 e 2008. Pola súa parte, a solta de lumbrigantes comezou en marzo do ano pasado, coa liberación de 3.100 unidades desta especie en augas da Reserva Mariña “Os Miñarzos” en Lira.