Notas de prensa

Caixa Galicia aporta 100.000 euros ao centro asociado da Uned en Lugo

O director do centro asociado da UNED en Lugo José Luis Arroyo e o director territorial de Caixa Galicia, Walter Álvarez, asinaron o convenio de colaboración mediante o cal a entidade galega colaborará para a creación e posta en marcha do novo centro da UNED en Lugo. Neste acto estiveron presentes, ademais dos representantes das institucións asinantes, o alcalde de Lugo na súa calidade de presidente do padroado e o vicepresidente da Deputación, o nacionalista Antón Bao, na súa calidade de vicepresidente do padroado.

Caixa Galicia, a través da súa obra social, fará unha achega total de 235.000 euros destinados a financiar as actividades necesarias para o funcionamento do centro asociado de Lugo, que comezará a súa andaina o vindeiro curso 2008-2009 e que contará, segundo fontes da UNED, cona máis de un milleiro de alumnos. O convenio de colaboración entre Caixa Galicia e a UNED permanecerá vixente ata o 31 de marzo de 2011. A UNED recibirá da entidade financeira galega, antes do remate do 2008, un total de 100.000 euros para apoiar a creación do centro e para a realización de actividades. Nos anos 2009 e 2010 Caixa Galicia aportaralle a UNED 75.000 e 60.000 euros respectivamente.

Antón Bao asistiu a esta xuntanza en calidade de vicepresidente do padroado e manifestou a súa satisfacción polo feito de que unha das entidades financeiras galegas con maior implantación en Lugo aposte dun xeito decidido por apoiar proxectos educativos que revertan na formación da sociedade lucense. Segundo Antón Bao “a colaboración de esta entidade financeira galega é fundamental para que o centro da UNED sexa unha realidade en Lugo” o vicepresidente da Deputación tamén fixo referencia a disposición de Caixa Galicia á hora de colaborar coas institucións para a programar actividades tanto no eido cultural, deportivo ou social.