Notas de prensa

O director xeral de Comunicación Audiovisual asistiu á premiere do filme O menor dos males no Festival de Montreal

O director xeral de Comunicación Audiovisual, Manuel José Fernández Iglesias, que participa en representación da Secretaría Xeral de Comunicación no Festival de Cine de Montreal (Canadá), asistiu á premiere do filme galego O menor dos males, da productora Voz Audiovisual. Fernández Iglesias destacou a “fenomenal acollida” da obra do director Antonio Hernández, que conta ca presenza dos aplaudidos actores galegos Antonio Durán “Morris”, César Cambeiro e Xavier Deibe.

O director xeral de Comunicación Audiovisual permanece en Montreal para acompañar aos representantes das produccións galegas participantes, nun festival que recolle cada ano o máis relevante da producción independente internacional. Segundo as palabras de Fernández Iglesias “a presenza de dúas produccións de total capital galego e nas que participan destacados artistas galegos é realmente significativa e supón un importante recoñecemento para o noso audiovisual galego”.

O menor dos males

O filme O menor dos males, ambientado nunha casa de campo galega durante un fin de semana, reflexiona sobre a corrupción e a política. O encontro de dous irmáns na antiga casa familiar supón o punto de partida para unha trama na que se mesturan a comedia e o suspense, e mesmo o cine negro. No reparto, ademais dos citados actores galegos, destaca a presencia de Carmen Maura, Verónica Echegui e de Roberto �lvarez. Os artistas galegos, segundo destacou o director xeral de Comunicación Audiovisual, foron “moi aplaudidos” nos seus respectivos papeis como paparazzi (Morris) e escoltas (Cesar Cambeiro e Xavier Deive) nunhas interpretacións “magníficas e moi convincentes”.

A premiere supón a segunda participación deste ano no Festival de Cine de Montreal, logo da estrea da opera prima de Jorge Algora, O neno de barro, o pasado 24 de agosto cunha moi boa acollida nas proxeccións nos cinemas do Barrio Latino de Montreal. Arredor de 1.000 persoas asistiron a cada unha das proxeccións deste filme galego, o que supuxo catro cheos consecutivos nas salas de proxección desde o día 24 ao 27 de agosto.

Visita á Cinemateca do Quebec

Manuel Fernández aproveitou a sua estancia en Montreal para facer unha visita institucional á Cinemateca do Quebec, co obxectivo de estudar os instrumentos de apoio a produción e difusión do audiovisual nesa provincia canadiana. Ao igual que no caso galego, o Canadá caracterízase pola convivencia de duas linguas, o francés e o inglés, e pola existencia de instrumentos públicos para o financiamento da produción e difusión do audiovisual na lingua principal do Quebec, neste caso o francés. Co gallo desta visita analizáronse tanto as iniciativas promovidas dende o eido da cultura pola Sociedade de Desenvolvemento das Industrias Culturais, como as promovidas desde o eido da comunicación por Telefilm Canadá e os seus fondos de capital, fondos de longametraxes, e fondos para novos medios de comunicación.