viernes, 26 de abril de 2024
O presidente do Goberno galego, Alberto Núñez Feijóo, destacou o papel dos medios de comunicación en xeral e de Cope en particular para ofrecer referencias, exemplos e modelos e aprender do que facemos e do que somos.
Durante o acto de celebración do 50º aniversario de Cope Galicia, Feijóo destacou así a traxectoria desta emisora avalada e certificada pola confianza da audiencia. Non en van, lembrou que nos seus arquivos sonoros están as voces dun pobo que protagonizou unha epopea descomunal: En cinco décadas, un breve suspiro en termos históricos, os galegos abandonan o atraso e instálanse no futuro da man das súas empresas, dos seus centros de investigación, das súas universidades, e tamén en compañía dos seus medios de comunicación, aseverou, ao que engadiu que non se forma parte de Galicia durante medio século sen un esforzo de adaptación constante, sen unha atención precisa á evolución do país, nin tampouco sen a humildade suficiente para entendelo.
Nesta mesma liña, subliñou que cada periodista da canle sente o peso dos seus colegas de antano e de millóns de oíntes que se sentiron libres coa radio. Cada periodista é herdeiro dunha reputación acumulada durante medio século, dixo, incidindo en que a verdade é imprescindible para que a democracia non esmoreza.
Feijóo concluíu a súa intervención destacando que, lonxe de ser hoxe a única protagonista, a familia da Cope preferiu acompañarse nesta ocasión especial da sensibilidade social da Fundación Barrié, do arraigo de Gadisa, da humanidade de Cáritas Galicia, da solidariedade da Provincia Franciscana de Santiago, e do espírito de superación de David Cal. Neses valores atopamos a clave desa sintonía tan duradeira e ininterrompida da Cope e de Galicia, sentenciou.
A Cidade da Cultura reunirá estes días as persoas representantes dunha vintena de linguas minoritarias de Europa. Será durante a asemblea xeral e a conferencia anual da Network to Promote Linguistic Diversity (NPLD), unha organización de ámbito europeo cuxa finalidade é promover a diversidade lingüística na UE. Entre os seus membros figura, desde a súa creación, a Xunta de Galicia, que, a través da Consellería de Cultura actúa como anfitrioa nos eventos de 2024. Na xornada trataranse os asuntos que atinxen á administración da organización e presentaranse varios informes.
A Xunta vai solicitar de xeito inmediato ao Goberno central o traspaso dos medios materiais e persoais para xestionar a súa costa trala sentenza do Tribunal Constitucional que avala a Lei de ordenación e xestión integrada do litoral de Galicia. A conselleira de Medio Ambiente e Cambio Climático, Ángeles Vázquez, respondeu unha pregunta no pleno do Parlamento sobre esta materia na que salientou que o Alto Tribunal certifica que a norma galega é plenamente constitucional. Ademais, subliñou, confirma o que sempre defendeu a comunidade, que non é necesario reformar o Estatuto de Autonomía para que Galicia poida exercer plenamente as súas lexítimas competencias sobre o litoral.
