viernes, 19 de abril de 2024
O venres 10 ten lugar en Palexco unha xornada de debate arredor dos Desafíos atlánticos na véspera do Brexit, mentres que o sábado, o pazo municipal acollera o Buró Executivo da Conferencia das Cidades do Arco Atlántico, no que participan representantes municipais de Avilés, Santander, Brest, La Rochelle, Sligo, Lisboa, Rennes, Braga, Las Palmas ou Santa María da Feira, ademais da Coruña, así como membros do Parlamento e a Unión Europea e do Eixo Atlántico.
O alcalde da Coruña, Xulio Ferreiro, salientou en rolda de prensa que os actos que terán lugar na Coruña organizados polo Concello en colaboración coa Conferencia de Cidades do Arco Atlántico, da que forma parte, e o Comité das Rexións da Comisión Europea, veñen a referendar, unha vez máis, "o peso da cidade a nivel estatal e internacional", así como a vontade do Goberno local "de aproximar A Coruña ao mundo, de traballar en rede e de cooperar con outras cidades". Desta forma, o venres 10 de febreiro, terá lugar a partir das 09.00 horas da mañá en Palexco unha xornada de debate arredor dos "Desafíos atlánticos na véspera do Brexit". O rexedor agradeceu "a aposta da Unión Europea e a súa disposición, tanto na organización como no financiamento deste acto". Posteriormente, o sábado, o Pazo municipal de María Pita acollerá o Buró Executivo da Conferencia das Cidades do Arco Atlántico, tal e como se acordou na xuntanza deste órgano executivo no que Ferreiro participou en xullo na cidade francesa de Brest. "Traer aquí a celebración desta reunión de traballo foi unha iniciativa compartida co presidente da conferencia de cidades e alcalde de Viana do Castelo, José María da Cunha Costa", engadiu.
A xuntanza do Buró Executivo da Conferencia de Cidades do Arco Atlántico é, como indicou o alcalde, "especialmente significativa" por ser preparatoria de cara á vindeira asemblea xeral da entidade, na que se renovarán os órganos directivos e se planificará o futuro desta plataforma. En segundo lugar, debaterase tamén sobre a creación de tres novas comisións técnicas bosquexadas en Brest, nas que A Coruña terá un papel singular, como a de Economía do Mar e Ciclo da Auga, Dereito á Cidade e Participación e Desenvolvemento Urbano.
"Todos estes encontros serán especialmente proveitosos para a cidade, que volve a demostrar o seu peso e vocación de cooperación", explicou Ferreiro, quen adiantou que ademais dos propios representantes municipais do Concello da Coruña, a estas xornadas tamén acudirán membros dos Gobernos locais de Avilés, Santander e Las Palmas, Brest, La Rochelle e Rennes (Francia), Sligo (Irlanda), e Santa María da Feira, Braga e Lisboa (Portugal), así como membros do Parlamento Europeo, a Unión Europea e o Eixo Atlántico.
'Declaración da Coruña'
A conferencia Desafíos Atlánticos en vésperas do Brexit, que terá lugar no edificio Palexco o vindeiro venres, terá como obxectivo fundamental o actual contexto europeo e atlántico. O acto, no que se entregará a Las Palmas o premio de Cidade Atlántica do Ano, contará cunha intervención sobre as cidades do mar e outros proxectos marítimos. "Todos os temas que se abordarán serán especialmente importantes, tendo en conta que competen á Coruña, pero tamén son fundamentais no resto de Europa. É o caso as cláusulas sociais na contratación pública, os proxectos Smart Cities, o dereito das mulleres á cidade ou os orzamentos participativos", avanzou Ferreiro, que tamén participará cunha ponencia sobre o Dereito á Cidade.
Ademais, esa mesma xornada o alcalde da Coruña tamén intervirá para explicar as liñas básicas do que será a Declaración da Coruña, documento que asinarán os e as representantes municipais do Arco Atlántico reunidos na cidade é que servirá como "prólogo á reflexión estratéxica que terá lugar en Lisboa, no marco da vindeira asemblea xeral da Conferencia de Cidades do Arco Atlántico". A citada declaración, sinalou Ferreiro, "marcará as liñas de cooperación das cidades atlánticas, deixando claro a súa vontade de continuar colaborando de beira a beira do Océano Atlántico".
A Declaración da Coruña sostén, entre outros dos seus puntos, "a importancia de que dende Europa se fomenten as políticas de cohesión como instrumento fundamental de desenvolvemento, rexeitando toda iniciativa que conduza a unha revisión total ou parcial da mesma". Co citado documento tamén se solicitará á Unión Europea á revisión da Axenda Urbana Europea, de forma que "os programas urbanos ofrezan facilidades de acceso ás cidades medias ou con características xeográficas específicas".
O director xeral de Relacións Exteriores e coa UE, Jesús Gamallo, participou na sesión plenaria do Comité Europeo das Rexións (CdR), onde Galicia presentou 21 emendas a catro dos ditames sometidos a aprobación. Un dos máis relevantes para a comunidade foi o ditame sobre a ferramenta de facilitación transfronteiriza. Calcúlase que a eliminación do 20% das barreiras e obstáculos xurídicos e administrativos actuais entre rexións de fronteira na UE -entre as que se atopa Galicia, que conforma unha Eurorrexión xunto co Norte de Portugal- permitiría aumentar o seu PIB nun 2% e crear nelas ata un millón de empregos.
InnovArt 24, o maior evento en Galicia de promoción e difusión das ensinanzas artísticas, de idiomas e deportivas propicia o encontro entre as vocacións e os profesionais, e facilita que o alumnado de diferentes niveis educativos se familiaricen e tomen contacto cos eidos da arte dramática, as artes plásticas e deseño, a conservación e restauración de bens culturais, a danza, as ensinanzas deportivas, os idiomas e a música. A feira conta cunha zona de 4.100 m² no Museo Centro Gaiás, na que os visitantes poden participar en obradoiros de artes plásticas e deseño, traballos de conservación e restauración de bens culturais, actividades deportivas didácticas de música, arte dramática e danza, así como de idiomas. Tamén se ofrecen mostras e exhibicións das distintas ensinanzas, concertos, conferencias e espectáculos escénicos en directo.
