viernes, 19 de abril de 2024
O presidente do Goberno galego, Alberto Núñez Feijóo, enviou unha misiva ao novo presidente da República de Portugal, Marcelo Rebelo de Sousa, para felicitalo polo apoio maioritario acadado nas eleccións celebradas onte.
Neste senso, o máximo responsable autonómico puxo en valor que o pobo veciño elixise a un candidato que aposta polo diálogo e o acordo e que sen dúbida, saberá garantir a estabilidade política de Portugal.
Por outra banda, Feijóo destacou a excelente relación da Galicia co país luso e lembrou que nos últimos anos a Comunidade tivo a inmensa honra de recibir ao seu antecesor no cargo en diversas ocasións, unha delas con motivo da sinatura dun memorando de entendemento para a difusión da lingua portuguesa en Galicia.
Con respecto a isto, amosou a súa confianza en que nesta nova etapa se poidan seguir consolidando os especiais vínculos entre Galicia e Portugal.
O director xeral de Relacións Exteriores e coa UE, Jesús Gamallo, participou na sesión plenaria do Comité Europeo das Rexións (CdR), onde Galicia presentou 21 emendas a catro dos ditames sometidos a aprobación. Un dos máis relevantes para a comunidade foi o ditame sobre a ferramenta de facilitación transfronteiriza. Calcúlase que a eliminación do 20% das barreiras e obstáculos xurídicos e administrativos actuais entre rexións de fronteira na UE -entre as que se atopa Galicia, que conforma unha Eurorrexión xunto co Norte de Portugal- permitiría aumentar o seu PIB nun 2% e crear nelas ata un millón de empregos.
InnovArt 24, o maior evento en Galicia de promoción e difusión das ensinanzas artísticas, de idiomas e deportivas propicia o encontro entre as vocacións e os profesionais, e facilita que o alumnado de diferentes niveis educativos se familiaricen e tomen contacto cos eidos da arte dramática, as artes plásticas e deseño, a conservación e restauración de bens culturais, a danza, as ensinanzas deportivas, os idiomas e a música. A feira conta cunha zona de 4.100 m² no Museo Centro Gaiás, na que os visitantes poden participar en obradoiros de artes plásticas e deseño, traballos de conservación e restauración de bens culturais, actividades deportivas didácticas de música, arte dramática e danza, así como de idiomas. Tamén se ofrecen mostras e exhibicións das distintas ensinanzas, concertos, conferencias e espectáculos escénicos en directo.
